QAZAQ GREEN.  5 маусымда Ашхабадта Түркіменстанның ұлттық энергетикалық компанияларымен бірлесіп Turkmen Energy Forum ұйымдастырған «Көмірсутек кен орындарын игеру кезінде инновациялық технологияларды енгізудің экологиялық аспектілері» (TESC) халықаралық ғылыми-практикалық конференциясы өтеді. Оның тақырыбы – «Сенімді, тұрақты, таза энергия».

Іс-шараның негізгі екпіні мұнай мен газ өндіру кезінде шығарындыларды азайтуға, сондай-ақ энергетикалық ауысу мәселелеріне бағытталады.

Қатысушылар қатарында Түркіменстан үкіметінің өкілдері, ұлттық және шетелдік мұнай-газ компанияларының, халықаралық энергетикалық және экологиялық құрылымдардың басшылары бар. CNPC, BP, ExxonMobil, Petronas, ADNOC, Dragon Oil, ENI, Лукойл, IRENA, Газ экспорттаушы елдер форумы, БҰҰ, ЕҚЫҰ, Дүниежүзілік банк, АДБ, ЕҚДБ және басқалар сияқты компаниялар мен ұйымдардың қатысуы күтілуде.

Күн тәртібінде – парниктік газдар мен ілеспе газдар шығарындыларын азайтуға, Каспий экожүйесін сақтауға, климаттық бастамаларға және жаңартылатын энергетиканы дамытуға бағытталған инновациялық технологиялар. Сондай-ақ, «жасыл» секторда инвестициялық мүмкіндіктер ұсынылады.

Түрікменстан жасыл белдеулерді құру, шөлейттенуге қарсы күрес, экологиялық таза көлікті дамыту, сондай-ақ Орталық Азияда Климаттық технологиялардың өңірлік орталығын ашу жөніндегі ұсыныстарды қоса алғанда, экологиялық бастамаларды ілгерілетуде.