QAZAQ GREEN. Қазақстанда жалпы қуаты 1 ГВт жел электр станцияларын салу жоспарланған. Бұл Қазақстан президенті Қасым-Жомарт Тоқаев пен Франция президенті Эммануэль Макрон арасындағы Қазақстанға ресми сапары барысында келіссөздердің нәтижесі болды, деп хабарлайды Ақорда.

Кездесуде осы жобаны іске асыру үшін бірлескен кәсіпорын құру туралы келісімге қол қойылды. Президент Тоқаев Макронға сапары үшін ризашылығын білдіріп, Қазақстан мен Франция арасындағы серіктестіктің маңыздылығын атап өтті.

«Биыл екі ел арасындағы Стратегиялық әріптестік туралы келісімге қол қойылғанына 15 жыл толды. Достық пен өзара қолдауға негізделген осы ынтымақтастықты одан әрі нығайту – ортақ міндетіміз. Біз бірге күш жұмылдырып, көздеген мақсатқа жетеміз. Мен бұған кәміл сенемін. Сондықтан бүгінгі сапардың мән-маңызы айрықша», – деді Қасым-Жомарт Тоқаев.

Келіссөздер барысында сауда, экономика, инвестициялар, сондай-ақ түрлі салалардағы жаңа жобалар сияқты түрлі салалардағы ынтымақтастықты кеңейту жоспарлары талқыланды. "Жасыл" экономикаға көшу және климаттың өзгеруіне қарсы күрес мәселелеріне ерекше назар аударылды.

Эммануэль Макрон сонымен қатар Францияның Қазақстанда тек энергетика саласында ғана емес, аэроғарыш өнеркәсібін қоса алғанда, басқа да салаларда қатысуын күшейтуге дайын екенін білдірді.

«Француз компаниялары сауда және энергетика салаларында ұзақмерзімді серіктестік орнатты. Компанияларымыздың басқа да салаларда бірлесе жұмыс істегенін қалаймыз. Ынтымақтастықтың негізгі бағыттары белгілі. Олар – энергетика және аэроғарыш өнеркәсібі салалары", – деді Эмманюэль Макрон.

Келіссөздер нәтижесінде Қазақстан мен Франция басшылары Бірлескен мәлімдеме жасады және екі елдің ресми делегация мүшелері мынадай құжаттарға қол қойды:

• Қазақстан Республикасының Үкіметі мен Француз Республикасының Үкіметі арасындағы Қазақстанда Француз даму агенттігі тобын құру және оның жұмыс істеуі туралы келісім;

• Қазақстан Республикасының Үкіметі мен Француз Республикасының Үкіметі арасындағы Қазақстан Республикасында халықаралық (француз) мектептер ашуға және Қазақстан Республикасының білім беру ұйымдарында француз тілін оқытуға қатысты келісім;
  
• Франция мен Қазақстан арасындағы стратегиялық пайдалы қазбалар бойынша ынтымақтастық туралы бірлескен ниет декларациясы;
  
• «QazBioPharm «ҰХ» АҚ мен Boehringer Ingelheim Animal Health France компаниясы арасында Қазақстан Республикасында аусылға қарсы вакцинаны жергілікті өндіру бойынша ынтымақтастық, лицензия және жеткізу туралы келісім;
  
• Энергияны жинақтау жүйесі бар, жиынтық қуаты 1 ГВт жел электр станцияларын салу жобасы бойынша бірлескен кәсіпорын туралы келісім;
  
• «Қазақстан Республикасында теміржол локомотивтері мен жылжымалы құрамды, сондай-ақ теміржол техникасының қосалқы бөлшектерін өндіру және оларға сервистік қызмет көрсету» жобасын іске асыру жөніндегі инвестициялар туралы келісім.