QAZAQ GREEN.  Қуаты 247 МВт болатын гибридті электр станциясын салу бойынша «Самұрық-Қазынаның» инвестициялық жобасын Қордың портфельдік компаниясы «ҚазМұнайГаз» және итальяндық Eni S.p.A энергетикалық компаниясы жүзеге асыруда, деп хабарлады «Самұрық-Қазына» баспасөз қызметі.

Гибридті жоба жаңартылатын энергия көздерінен (жел және күн) және электр энергиясын теңгерімдеу үшін газ электр станциясынан электр қуатын аралас өндіруді көздейді.

Жоба іске қосылғаннан кейін күн электр станциясының қуаты 50 МВт, жел электр станциясының - 77 МВт, ал газ электр станциясының қуаты 120 МВт құрайды.

Гибридті жобада өндірілетін электр энергиясының шамамен 40%-ы толықтай «жасыл» болады, осылайша ауаға шығарылатын көмірқышқыл газын едәуір азайтуға ықпал етеді.

Қазіргі уақытта газ электр станциясының құрылыс алаңында бастапқы жұмыстар жүргізіліп, күн электр станциясының құрылыс жұмыстары басталды. Жел электр станциясына арналған жел турбиналары жеткізушісін анықтау бойынша тендерлік рәсімдер өткізіліп жатыр.

Гибридті электр станциясының құрылыс кезеңінде 800 адамға дейін жұмыспен қамтылса, қолданысқа берілген соң 70 жаңа жұмыс орны ашылады.