QAZAQ GREEN.  Әзірбайжан Парламенті бірінші оқылымда Қазақстанмен және Өзбекстанмен «жасыл энергияны» дамыту және беру саласындағы стратегиялық әріптестік туралы келісімді бекітті, деп хабарлайды Вестник Кавказа.

Бұл мәселе 3 ақпанда өткен Парламенттің көктемгі сессиясының биылғы бірінші отырысында талқыланды.

Келісімге белгісіз мерзімге қол қойылды. Ол энергия секторында елдер арасындағы өзара іс-қимылдың жаңа стратегиялық шеңберін белгілеу үшін әзірленді.

Құжат Париж климаттық келісімінде көзделген парниктік газдарды азайту жөніндегі мақсаттарға сәйкес жасыл энергетиканы дамытуға жәрдемдесуге бағытталған.

Осы шеңберде тараптар жаңартылатын энергия көздерін өндіру, беру және сауда саласында ынтымақтастықты жүзеге асыруды, жасыл сутегі мен жасыл аммиак технологияларын енгізуді қолдауды жоспарлап отыр.

Caspian Barrel мұнай зерттеулер орталығының директоры Ильхам Шабан «Вестник Кавказа» тілшісімен әңгімелесу барысында Әзірбайжан, Қазақстан және Өзбекстан жасыл энергияны өндіру мен тасымалдауда ынтымақтастықты дамытуды жоспарлап отырғандығы туралы бөлісті.

«2023 жылдың қараша айында Бакуде үш елдің энергетикалық жүйелерін біріктіру жобасын қарау мүмкіндігі туралы уағдаластыққа қол жеткізілді. 2024 жылғы мамырда үкіметаралық келісімге қол қойылды, осы құжат шеңберінде елдердің үкіметтері ынтымақтастық бағыттарын айқындады. Ең негізгісі – Өзбекстан мен Қазақстаннан Каспий түбімен Әзірбайжанға, одан әрі Еуропаға жасыл энергия жеткізу», – деп хабарлады ол.

«Еуропалық одаққа жасыл энергияны экспорттау жобасын 2028 жылға дейін іске асыру жоспарлануда. Үш елдің де жасыл энергетикамен, сондай-ақ мұнай мен газ өндірумен айналысқанын және айналысатынын ескерсек, үшжақты ынтымақтастық оларға энергетика секторын әртараптандыруға жол ашады және экономиканың осы саласында жаңа сын-тегеуріндер туғызады», – деп атап өтті Ильхам Шабан.

Экономист Әзірбайжанның жасыл энергетикаға қаншалықты көңіл бөлетінін еске салды. «Әзірбайжан 2028 жылға қарай энергия теңгерімінде жасыл энергетиканың 30%-дық үлесі болатынын мәлімдеді. Қазіргі уақытта, яғни 2024 жылдың қорытындысы бойынша ол 14% алады. 2030 жылға қарай оның үлесі 35%-ға дейін көтеріледі. Әзірбайжан Париж келісімі бойынша міндеттемелерді өз мойнына алып, оларды белгіленген мерзімге дейін орындайды», – деп мәлімдеді ол.