QAZAQ GREEN.  Бакуде жасыл энергия жөніндегі консультативтік кеңес аясында 3-ші Министрлік кездесу өтті.  Отырыс Әзербайжан басшысы Ильхам Алиевтің төрағалығымен өтті, оған Түркия, Грузия, АҚШ, БАӘ және Еуропа елдерінің өкілдері қатысты. Кездесуде «жасыл энергетикалық дәліз» мәселелері талқыланды. Кездесуде Қазақстаннан ҚР Энергетика вице-министрі Сұңғат Есімханов және KEGOC компаниясының басшысы Наби Айтжанов қатысты, деп хабарлайды KEGOC баспасөз қызметі 

Қазақстан ілеспе газды кәдеге жарату технологияларын және «жасыл» сутегіні өндіру жөніндегі перспективалы жобаларды қоса алғанда, төмен көміртекті шешімдерді дамытуды белсенді қолдайды. Жақында қол қойылған үшжақты келісім шеңберінде Қазақстан, Әзірбайжан және Өзбекстан арасында «жасыл энергетикалық дәліздің» бөлігі ретінде Каспий теңізі арқылы жоғары вольтты суасты кабелін салу бастамасы іске асырылуда.

Қазақстан делегациясының басшысы энергетика вице-министрі Сұңғат Есімханов Қазақстанның өңірлік және халықаралық энергетикалық ынтымақтастықты тереңдетуге, «жасыл» энергетика құрамдастарын қоса алғанда, энергия ресурстарын жеткізудің әртараптандырылған және экологиялық қауіпсіз бағыттарын дамытуға бейілділігін растады.

«KEGOC» АҚ бірегей жобаны – Каспий теңізінің түбімен созылатын терең суасты кабелін салуға белсенді қатысады. Бұл суасты бағдары Қазақстан, Өзбекстан және Әзірбайжан арасындағы ынтымақтастықты тереңдетуге ықпал ететін энергетикалық инфрақұрылымның негізгі элементі болады. Кездесуде донорлардың гранттық қаражаты есебінен әзірлемені қаржыландыру жоспарланып отырған техникалық-экономикалық негіздемені дайындауға арналған техникалық тапсырма таныстырылды.

«KEGOC» АҚ Қазақстан Республикасының Бірыңғай электр энергетикалық жүйесінің жүйелік операторының функцияларын орындайды, Ұлттық электр желісінің (ҰЭЖ) активтеріне иелік етеді және басқарады. Негізгі қызмет түрлері табиғи монополия саласына жатады. Компанияның балансында ұзындығы 27 мың км-ден асатын, кернеуі 220-1150 кВ электр беру желілері және ҰЭЖ құрайтын трансформаторлардың 39,1 ГВА белгіленген қуаты бар 83 электр қосалқы станциясы бар.