QAZAQ GREEN. Аукциондық сауда тетігі енгізілгеннен кейін Қазақстан  жаңартылатын энергетика жобаларын іске асыруға 14 елден 260-тан астам компанияны тартты. Инвесторлар қатарында Қытай, Германия, Түркия, Франция, БАӘ, Оңтүстік Корея және өзге де елдердің өкілдері бар, деп хабарлайды Энергетика министрлігінің баспасөз қызметі.

Қазақстан «жасыл» энергетика саласына инвестиция тарту тұрғысынан сенімді әрі ашық алаң ретінде өз позициясын нығайтып келеді. Бүгінде ел аумағында жалпы орнатылған қуаты 3 122 МВт болатын 156 жаңартылатын энергия көздері (ЖЭК) нысаны жұмыс істеп тұр. 2024 жылдың соңында олардың саны 153, қуаты 3 032 МВт болған.

2024 жылы ЖЭК арқылы өндірілген электр энергиясының көлемі 7,581 млрд кВт·сағ-қа жетті. Оның негізгі үлесін –4,513 млрд кВт·сағ –жел электр станциялары қамтамасыз етті. Одан кейінгі орында –күн электр станциялары (1,889 млрд кВт·сағ), шағын ГЭС (1,177 млрд кВт·сағ) және биоэнергетика (1,58 млрд кВт·сағ).

Қазіргі уақытта жалпы қуаты 2 258 МВт болатын 91 жоба жүзеге асырылып жатыр. Олардың қатарында жел, күн, шағын су және биоэнергетикалық нысандар бар.

2027 жылдың соңына дейін жалпы қуаты 4,6 ГВт болатын ЖЭК жобалары бойынша жаңа аукциондар өткізу жоспарланып отыр. Негізгі басым бағыттар: энергияны сақтау жүйелерін дамыту, В2В келісімшарттарын жетілдіру, ЖЭК-ті теңгерімдеуші нарыққа интеграциялау, шағын генерацияны қолдау және ЖЭК объектілері үшін диспетчерлік артықшылықты алып тастау.

Жүйелі тәсіл, инвестициялардың ауқымы және халықаралық қатысу Қазақстанды жаңартылатын энергия көздерін дамыту саласында өңірлік көшбасшылардың біріне айналдырып отыр.