QAZAQ GREEN.  Қазақстан Президенті Қасым-Жомарт Тоқаев 25-ші Петербург Халықаралық экономикалық форумында сөйлеген сөзінде еліміздің «жасыл» инвестициялар саласындағы жоспарлары туралы айтты, деп хабарлайды Мемлекет басшысының баспасөз қызметі.

«Біз «жасыл» инвестициялардың өсуі және тиісті жобаларды іске асыру үшін мүмкіндіктерді жүйелі түрде кеңейтуді жоспарлап отырмыз», - деп атап өтті ол.

Президент экологиялық проблемалардың жаһандық сипатқа ие екеніне және әлемнің барлық дерлік елдеріне, соның ішінде Қазақстанға да әсер еткеніне тоқталды. Қазақстандық фермерлер өткен жылы өзендердегі судың таяз және жауын-шашынның аз болуы салдарынан құрғақшылықтан зардап шекті.  Тоқаев трансшекаралық Жайық өзенінің жағдайы ауыр екенін еске салды.

«Біздің мемлекеттеріміздің тұрақты дамуына осындай ұзақ мерзімді сын-қатерлерді бірлесіп шешу керек деп санаймын. Біз «тұйық цикл экономикасы» - айналмалы экономика қағидаттарын енгізу перспективаларын байыпты қарауымыз керек деп ойлаймын. Біз ЖІӨ энергия сыйымдылығын азайту, жаңартылатын энергетика секторын кеңейту және осы саладағы транзиттік шығындарды азайту бойынша жұмыс істеп жатырмыз», - деп түйіндеді ол.

Естеріңізге сала кетейік, Қазақстан 2016 жылғы 2 тамызда Франция астанасында 2015 жылғы 12 желтоқсанда қабылданған Климат жөніндегі Париж келісіміне қосылу туралы шешім қабылдады. Өткен жылдың желтоқсан айында Қазақстан 2060 жылға қарай көміртегі бейтараптығына қол жеткізуге уәде берді.

Келісім парниктік газдар шығарындыларының көлемін азайту, климаттық өзгерістерге бейімдеу және тиісті технологияларды дамыту пайдасына қаржы ағындарын қалыптастыру жөніндегі ұлттық жобаларды қабылдауға бағытталған шаралар мен міндеттемелер кешенін ұсынады.

Келісім тұрақты даму және кедейлікті жою жөніндегі күш-жігер тұрғысында климаттың өзгеру қаупіне жаһандық ден қоюды нығайтуға бағытталған. Ол үшін жаһандық орташа температураның өсуін 2°C-ден әлдеқайда төмен ұстап тұру, сонымен қатар температураның өсуін 1,5°C-ге дейін шектеуге күш салу ұсынылады.