QAZAQ GREEN.  Энергетика министрі Болат Ақшолақов Алматыда KIOGE-2022 көрмесі мен конференциясының ашылуы барысында Қазақстанды көміртексіздендіру және «жасыл» энергетиканы дамыту жөніндегі жоспарлары туралы хабарлады.

Қазақстан дәйекті энергетикалық ауысу және мұнай-газ секторын кезең-кезеңімен көміртексіздендіру бағытын ұстанады.

«Біз жаңартылатын энергия көздерін дамытуға, көмір станцияларын газға ауыстыруға, газ кен орындарын игеруге және газ өңдеуге, мұнай-газ химиясына және сутегі энергетикасына ерекше назар аударамыз. Бұл - біз алдағы уақытта белсенді түрде дамытатын негізгі бағыттар», - деді Болат Ақшолақов.

Қазақстанның «жасыл экономикаға» көшуі жөніндегі бекітілген тұжырымдамаға сәйкес 2030 жылға қарай ЖЭК үлесі электр энергиясын өндірудің жалпы көлемінің кемінде 15%-ына, ал 2050 жылға қарай бұл көрсеткіш 50%-ға жетуі тиіс.

Естеріңізге сала кетейік, Қазақстанда 2018 жылдан бастап халықаралық аукциондық сауда-саттықтың ашық тетігі қолданылады.

«2018 жылдан бастап 2021 жылға дейінгі кезеңде жиынтық қуаты 1 705 МВт ЖЭК жобалары үшін электрондық форматта аукциондық сауда-саттық өткізілді. Сауда-саттыққа әлемнің 12 елінен 196 компания қатысты.

4 жыл ішінде 59 ЖЭК жобасын және қуаттылығы 1400 МВт болатын ірі ауқымды ЖЭК жобаларын пайдалануға беру жоспарлануда», - деп атап өтті министр.