QAZAQ GREEN. Еуропалық Одақ (ЕО) Қара теңіз энергетика кабелін (Black Sea Energy) жүргізу бастамасын мұқият қадағалап отыр. Бұл жоба арқылы Әзербайжанның жасыл энергиясы Грузия мен Румыния арқылы Еуропаға жеткізіледі, деп хабарлайды Media.az Report агенттігіне сілтеме жасап.

Еуропалық комиссия төрайымы Урсула фон дер Ляйен 2022 жылғы желтоқсанда Бухарестте Венгрия, Румыния, Грузия және Әзербайжан арасында жасыл энергетика саласындағы әріптестік туралы өзара түсіністік меморандумына қол қою рәсіміне қатысты.

«Еуропалық комиссия бұл маңызды үдерісте бақылаушы ретінде қатысуда. Бастама аясында кең ауқымды жасыл энергетикалық дәліз құру, соның ішінде суасты кабелін жүргізу және таза сутекті тасымалдау маршруттарын дамыту қарастырылған. Біз басқа елдердің бұл жобаға қызығушылық танытуын құптаймыз», – деді ЕО-ның ресми өкілі.

Оның айтуынша, Black Sea Energy ЕО-ның Global Gateway стратегиясындағы флагмандық жоба болып табылады және халықаралық ынтымақтастық құралы аясында қаржыландыру мүмкіндігін ашады.

«2024 жылдың соңында бастамашылар Black Sea Energy жобасын ЕО-ның трансшекаралық энергетикалық инфрақұрылымына арналған “өзара мүдделі жобалар” (TEN-E регламенті) тізіміне енгізуге өтініш берді. Енді біз келесі тізімді дайындау үшін қажетті талдаулар мен консультациялар жүргіземіз. Бұл мәртебе жобаға Connecting Europe Facility бағдарламасы аясында қаржылай қолдау алуға мүмкіндік береді», – деді ол.

Black Sea Energy жобасы Каспий теңізіндегі Әзербайжан секторында өндірілген жасыл энергияны Грузия арқылы өткізіп, Қара теңіздің түбінен тартылған кабель арқылы Еуропаға жеткізуді көздейді. Жылына 4 ГВт жасыл энергия экспорттау жоспарланған.

Жобаның техникалық-экономикалық негіздемесі (ТЭН) соңғы кезеңде әзірленуде. Құрылысты аяқтау үшін 3-4 жыл қажет. Еуропалық комиссия жобаны жүзеге асыруға €2,3 млрд қаржы бөлуді жоспарлап отыр.

2022 жылғы 17 желтоқсанда Әзербайжан, Грузия, Румыния және Венгрия Black Sea Energy жобасы аясында ұзындығы 1 195 км болатын суасты электр кабелін салу бойынша стратегиялық әріптестік туралы келісімге қол қойды. 2024 жылғы мамырда Әзербайжан, Румыния, Грузия және Венгрияның энергетикалық операторлары жобаны жүзеге асыру үшін бірлескен кәсіпорын құру туралы меморандумға қол қойды. Ал 2023 жылғы маусымда Болгария бұл бастамаға қосылуға ниетті екенін мәлімдеді. Сондай-ақ Сербия мен Молдова да жобаға қатысуға ниетті.