QAZAQ GREEN. Мемлекеттік сатып алу бойынша міндеттемелері бар жаңартылатын энергия көздерін пайдаланумен электр энергиясын өндіру жобалары үшін инвестициялардың ең төменгі жалпы көлемі анықталды.

Trend хабарлағандай, тиісті қаулыға Әзірбайжанның Премьер-Министрі Али Асадов қол қойды.

Қаулыға сәйкес, ең төменгі сома 30 миллион манат көлемінде белгіленді.

Айта кетейік, Әзірбайжан 2030 жылға қарай елдің энергетикалық балансындағы жаңартылатын энергияның үлесін 30%-ға жеткізуді мақсат етіп отыр. Энергетика министрлігінің мәліметінше, Әзірбайжандағы жаңартылатын энергия көздерінің техникалық әлеуеті құрлықта 135 ГВт-ны, теңізде 157 ГВт-ны құрайды. Экономикалық әлеуеті 27 ГВт-ға бағаланып, оның ішінде 3000 МВт жел энергиясы, 23000 МВт күн энергиясы, 380 МВт биоэнергетика және 520 МВт тау өзендерінің әлеуеті бағаланады.

2023 жылы Masdar компаниясымен ынтымақтастықта Каспий теңізі өңіріндегі және ТМД-дағы ең ірі, қуаты 230 МВт болатын Гарадаг күн электр станциясы іске қосылды. Станция 262 миллион АҚШ доллары көлеміндегі шетелдік инвестициямен салынды және шетел инвестициясымен салынған елдегі алғашқы өнеркәсіптік ауқымдағы күн электр станциясы болды. Станция жыл сайын 500 миллион кВт/сағ электр энергиясын өндіріп, 110 миллион текше метр табиғи газды үнемдеуге мүмкіндік береді.

ACWA Power компаниясымен ынтымақтастықта, қуаты 240 МВт Хызы-Абшерон жел электр станциясының құрылысы жалғасуда. Өткен жылы дәл осы компаниямен теңізде қуаты 1,5 ГВт-қа дейінгі жел электр станциясын іске асыру, қуаты 1 ГВт құрлықтағы жел станциясын құру туралы келісімдерге, сондай-ақ Әзірбайжанда энергия сақтау жүйесін дамыту бойынша өзара түсіністік туралы меморандумға қол қойылды.

Nobel Energy Management, TotalEnergies және AZ Czech Engineering компанияларымен Нахчыванда жалпы қуаты 1000 МВт-тан асатын жасыл энергетика жобаларын іске асыру бойынша келісім-шарттар жасалды.

Мұнымен қоса, Президент Ильхам Алиев Әзірбайжан Республикасының оккупациядан азат етілген аумақтарында «жасыл энергетика» аймағын құру шаралары туралы жарлыққа қол қойды. Жарлықты орындау аясында жапондық TEPSCO компаниясымен ынтымақтастық басталып, тиісті тұжырымдамалық құжат дайындалды. Губадлы, Зангилан, Джабраил және Физули аудандарында техникалық әлеуеті 7200 МВт-тан астам деп бағаланған күн энергетикасы жобаларын іске асыру үшін қолайлы жағдай жасалған. Лачин және Кялбажар таулы аймақтарында 2000 МВт жел энергетикасының техникалық әлеуеті анықталды. Сондай ақ Тертерчай, Хакаричай өзендерінде және олардың салаларында да айтарлықтай  гидроэнергетикалық қуат  бар.

Энергетикалық инфрақұрылымды құру және энергетикалық қауіпсіздікті қамтамасыз ету азат етілген аумақтарды қалпына келтіру процесінің ең маңызды құрамдас бөлігі болып саналады. Бұл бағытта қазірдің өзінде Лачин, Кялбажар және Суговушанда жалпы қуаты 20,2 МВт төрт су электр станциясы іске қосылды.

Сарапшылардың пікірінше, 2030 жылға қарай Әзірбайжанда электр энергиясын өндіру ішкі сұраныстан бірнеше есе асып түседі, бұл оны экспорттау қажеттілігін тудырады.