QAZAQ GREEN. Испанияның Каталония халықаралық университетінің (UIC) жетекшілігіндегі зерттеу тобы текстиль-керамикалық технология (TCT) мен перовскитті фотоэлектр элементтерге негізделген кірпіш жасап шығарды, деп хабарлайды PV Magazine.

Бұл құрылғы ғимараттарға орнатылатын фотовольтаикада (BIPV) қолдануға арналған. «Біз бұл технологияны нарыққа шығаруды жоспарлап отырмыз. Бұл зерттеудің және біз жұмыс істеп жатқан бірқатар жобалардың басты мақсаты болды», - деп зерттеудің авторы Педро Касарьего PV журналында атап өтті.

2011 жылы патенттелген TCT – болат сым торымен бекітілген керамикалық блоктар жүйесі. Ол шатырларда, алаңдарда және, ең алдымен, қасбеттерде, сондай-ақ желдетуді қолжетімді ететін ілмелі қасбет ретінде пайдалануға арналған.

«TCT көбінесе ені 0,6-дан 2 метрге дейінгі ұзын қабықтардан тұратын құрғақ құрылыс жүйесі ретінде қолданылады. Жүйенің артықшылықтарының бірі – құрылыс уақытын қысқарту, себебі дәстүрлі керамикалық қасбеттер қолмен орнатуды қажет етеді, онда кірпіштер бір-бірден қойылып, ерітіндімен біріктіріледі. Ал ұзын қабық бір элементпен жерді, қасбетті және шатырды жабуға мүмкіндік береді», - деп түсіндірді ғалымдар.

Зерттеу тобы өлшемі 300 мм x 117 мм болатын күн кірпішін және оған сай келетін өлшемі 99 мм × 99 мм перовскитті күн модулін (PSM) жасады. Олар электрлік қосылымдарды жасау үшін дәнекерлеуді қолданып, модульді қиғаш геометриялы пазға енгізді.

PSM мен керамикалық бөліктер арасындағы құрғақ қосылыс үшін қос L тәрізді тот баспайтын болат пластиналар пайдаланылды. «Пазды керамика ортасына емес, оңға немесе солға қарай орналастыруға болады, бұл әртүрлі композиция мүмкіндіктерін береді», - деп түсіндірді ғалымдар.

«Күн кірпіші нөлден жасалды және технологиялық дайындығы (TRL) 5 деңгейіне жетті. Перовскитті модуль жеке сынақтан өтті, ал кірпіш соққыға, дірілге және жылулық шокқа төзімділігі бойынша сынақтан өтті», - деді Касарьего.

Тесттер көрсеткендей, PSM соққыдан айтарлықтай зақым көрмеген, дегенмен модульді орналастыруға арналған паз кірпіштің беріктігін төмендетеді.

«Бұршақ соққан жағдайда тиімділік төмендейді, бірақ элемент жұмысын жалғастыра береді. Діріл сынақтарында дәнекерлеудің нәзіктігі байқалды, бірқатар бұзылулар 10 Гц жиілікте сынау кезінде анықталды», - деп ғалымдар атап өтті.

Кернеуді өлшегенде, PSM діріл әсеріне ұшырамайтыны анықталды. «Жалпы алғанда, сынақтар кезінде кірпіш дірілге қарсы тұрақтылық көрсетті, және керамикалық бөліктер мен PSM арасындағы құрғақ қосылыс тиімді жұмыс істейді», - деп қосты зерттеушілер.

Жалпы алғанда, күн кірпіші «жалпы түрде» жақсы жұмыс істейді және нарықта қолдануға дайын, бірақ басты мәселе – керамикалық бұйымдардың сынғыштығы. «Бұл кірпіштің дизайнын болашақ зерттеулерде қайта қарау қажет», - деп қорытындылады ғалымдар.

Жаңа технология жақында Construction and Building Materials журналында жарияланған «Текстиль-керамикалық технология үшін перовскитті күн кірпішін жобалау» атты зерттеуде ұсынылды. Зерттеу тобына Италиядағы Тор Вергата Рим университеті мен Францияның балама және атомдық энергия жөніндегі комиссиясының (CEA) ғалымдары кірді.