QAZAQ GREEN. Қытайлық инженерлер жаңа литий батареясымен жабдықталған ұшқышсыз ұшу аппаратын сынақтан өткізді. Батареяның энергия тығыздығы 400 Вт·сағ/кг, бұл ұшу қашықтығын 20–40%-ға ұлғайтады. Ол −40 °C-тан 60 °C-қа дейінгі температура диапазонында жұмыс істей алады. Бұл технология суық аймақтарда құтқару операциялары, патрульдеу және барлау жұмыстарын жүргізуге арналған, деп хабарлайды Хайтек+ Interesting Engineering-ке сілтеме жасап.

Ғалымдар Ляонин провинциясындағы Далянь аумағында композиттік қанатты дронның сынақтық ұшуын жүргізді. Дрон ауада үш сағаттан астам уақыт болды. Аппарат 400 Вт·сағ/кг энергия тығыздығына ие аккумулятормен жабдықталған, бұл бұрынғы 340 Вт·сағ/кг көрсеткішінен айтарлықтай жақсарған.

Ғалымдардың айтуынша, бұл литий батареясы ұшу сынақтары кезінде дронның өнімділігін 20–40%-ға арттырған. Сондай-ақ ол ұшу аппараттарына −40 °C-тан 60 °C-қа дейінгі кең температура аралығында жұмыс істеуге мүмкіндік береді.

Литий батареясын Қытай ғылым академиясының Далянь химиялық физика институтының ғалымдары әзірледі, ал дронды Шэньян автоматика институтының мамандары жасаған. Ұшу сынақтарынан кейін әзірлеушілер литий батареясының энергияны сақтау тиімділігі мен жұмыс тұрақтылығы толықтай расталғанын мәлімдеді.

Жоғары энергия тығыздығына және экстремалды температурада жұмыс істеу қабілетіне ие литий батареясын жасау үшін зерттеушілер никель құрамы жоғары үштік катод материалдарын әзірлеп, кремний-көміртек композиттік анодтарын оңтайландырды. Сондай-ақ катод пен анодтың сыйымдылығын теңестіріп, энергияны сақтау тиімділігін арттырған.

Бұған қоса, мұздану температурасын төмендету үшін арнайы қоспалар қосылған төмен температуралы еріткіштері бар жаңа электролит жасалды. Бұл суық жағдайда да иондық өткізгіштік пен зарядтау-разрядтау процестерінің тиімділігін сақтауға мүмкіндік береді.

Аккумулятордың қауіпсіздігін арттыру үшін ғалымдар төмен температураларда жоғары термиялық төзімділігі мен беріктігі бар жаңа композиттік сепаратор қолданды. Бұл кең температура диапазонында тұрақтылық пен қауіпсіздікті қамтамасыз етті. Көпқабатты композиттік стратегия компоненттерді орналастыру мен жылуды тарату жүйесін оңтайландырды.

Жоспар бойынша, бұл батарея суық аймақтардағы ұшқышсыз ұшу аппараттары мен басқа да техниканы құтқару операциялары, патрульдеу және барлау сияқты міндеттерді орындау барысында қолданатын болады.