QAZAQ GREEN. Siemens Gamesa жел турбиналарының қуаты бойынша әлемдік рейтингті басқарды, Эстерильдтегі Дания техникалық университетінің сынақ алаңында қуаты 21,5 мегаватт қондырғы сәтті орнатылды, деп хабарлайды Renew Economy.

276 метр диаметрлік SG DD-276 жаңа моделі әлемдік өндірушілер арасындағы технологиялық жарыста маңызды қадам болды. Соңғы уақытқа дейін қуат көшбасшылығы 20 МВт турбинаны орнатқан қытайлық Mingyang Smart Energy компаниясына тиесілі болды. Siemens Gamesa бұл нәтижені жаңартып, оффшорлық жел энергетикасы саласындағы жетекші өндіруші атағы үшін бәсекелестікті күшейтті.

Жаңа турбина әзірлемесі HIPPOW (Highly Innovative Prototype of the most Powerful Offshore Wind) жобасы аясында жүргізілді және ішінара Еуропалық одақ қаржыландырды. Siemens Gamesa төмен көміртекті технологияларды қолдаудың әлемдегі ең ірі көздерінің бірі – ЕО инновациялық қорынан 30 миллион еуро алды. Есептеулер бойынша, жаңа қондырғы Данияда жыл сайын 70 000 үй шаруашылығын электр энергиясымен қамтамасыз ете алады, бұл турбинаның бүкіл қызмет ету мерзімінде шығарындыларды 55 454 тонна CO₂ эквивалентіне азайтады.

Сонымен қатар, Қытайда жаңа әзірлемелер туралы жариялануда. Өткен жылдың қазан айында Dongfang Electric мемлекеттік корпорациясы қуаты 26 МВт жел турбинасы өндірісінің аяқталғанын хабарлады. Өз кезегінде, Mingyang Smart Energy 22 МВт келесі буын қордырғысы жобасын жариялады. Алайда, әзірге бұл турбиналардың ешқайсысы ресми түрде іске қосылмаған және Siemens Gamesa көшбасшылықты сақтауда.

Айта кету керек, бұл технологиялық жеңіс компания үшін қиын кезеңге тұспа-тұс келді. 2023 жылы Siemens Energy аналық құрылымы Siemens Gamesa үлкен шығындарына байланысты Германия үкіметінен 7,5 миллиард еуро мемлекеттік қолдау алды. Компания қайта құрылымдаудан өтті, ал бас директор Йохен Айкхольт өз еркімен лауазымынан кетті.

Дегенмен, рекордтық турбинаның іске қосылуымен Siemens Gamesa 2026 жылға қарай позицияларды қалпына келтіріп, пайдаға шығады деп күтеді. 2017 жылы Siemens Wind Power мен испандық Gamesa бірігуі нәтижесінде құрылған компания жаһандық жел энергетикасының негізгі ойыншыларының бірі болып қала береді.