QAZAQ GREEN. Еуропа климаттық мақсаттарға қол жеткізу және энергетикалық қауіпсіздікті арттыру үшін күн энергиясына қарай жылдам қадам басып жатқанда, ғалымдар бұл күш-жігерге қауіп төндіретін атмосфералық құбылыстың нашарлауы туралы ескертеді.  Әңгіме  Сахара шөлінен шыққан шаң туралы болып отыр, бұл фотоэлектрлік қондырғылардың тиімділігін төмендетіп қана қоймай, олардың өндірілуін болжауды қиындатады, деп хабарлайды   Technology Networks.

Бұл туралы Венгрияның және басқа еуропалық елдердің зерттеушілері Еуропалық геоғылымдар одағының (EGU25) Бас ассамблеясында «Жел көлеңкесі: Еуропадағы шаңды аспан жағдайындағы күн энергиясын өндіру» баяндамасының шеңберінде мәлімдеді. Доктор Дьёрдя Варги жетекшілік еткен топ 2019 және 2023 жылдар аралығында Сахарадан келген шаңды дауылдардың 46-дан астам жағдайын талдап, олар Орталық және оңтүстік Еуропадағы елдерді, соның ішінде Венгрия, Португалия, Испания, Франция, Италия және Грецияны қамтыды.

Сахара жыл сайын атмосфераға миллиардтаған тонна шаң шығарады, оның ондаған миллион тоннасы Еуропаға жетеді. Бұл кішкентай бөлшектер күн сәулесін шашыратады және сіңіреді, жер бетіндегі күн радиациясын азайтады және бұлттың пайда болуына ықпал етеді, мұның бәрі күн энергиясын өндіруді төмендетеді. Сонымен қатар, тұрақты аэрозоль деректеріне негізделген стандартты болжау үлгілері шаңды жағдайларда көбіне дәл емес болып жатады.

Зерттеудің авторлары болжамдық модельдерге нақты уақыттағы шаң жүктемесі туралы деректерді қосуды және аэрозольдердің бұлттармен әрекеттесуін ескеруді ұсынады. Бұл күн энергиясын пайдалануды дәлірек жоспарлауға және энергетикалық жүйенің тұрақтылығын арттыруға мүмкіндік береді. «Метеорологиялық және минералогиялық факторларды ескеретін динамикалық болжау әдістері қажет», - деді Варга. «Оларсыз күн генерациясының үлесі ұлғайған сайын эренгияны жеткіліксіз өндіру мен электр желілерінің істен шығу тәуекелі артады».

Атмосфералық әсерлерден басқа, зерттеушілер ұзақ мерзімді тәуекелдерді де атап көрсетеді: шаң панельдерге түсіп, олардың ПӘК-ін төмендетеді және тозуды тездетеді, бұл техникалық қызмет көрсету шығындарын арттырады. Жұмысқа Венгрияның Ғылыми-зерттеу, әзірлемелер және инновациялар жөніндегі ұлттық бюросы, Венгрия ғылым академиясы және Еуропалық Одақ қаржыландыратын Климаттың өзгеруі бойынша ұлттық көпсалалы зертхана қолдау көрсетті.