QAZAQ GREEN. Қазақстан жаңартылатын энергия көздері (ЖЭК) саласында айтарлықтай әлеуетке ие. Министрлік бес жылдық кезеңге аукциондық сауда-саттықты өткізу кестесін әзірлеп, бекітті. Бұл туралы энергетика министрі 16 қаңтарда Астанада өткен Үкімет отырысында хабарлады.

«Аукционға шығарылған жалпы қуат 6,7 ГВт құрады, бұл ретте өткізілген сауда-саттықтың қорытындысы бойынша 2027 жылдың соңына дейін 592 МВт енгізу жоспарлануда. 2029 жылға дейін инвестициялардың күтілетін көлемі 18 трлн. теңгеден асады», – деді ол.

Оның айтуынша, аталған жобаларды іске асыру энергия жүйесіндегі тапшылықты жоюға және оны қажетті қуат резервімен қамтамасыз етуге мүмкіндік береді.

«Жоспарланған генерация объектілері электр қуатының тепе-теңдігін және электр желілеріне біркелкі жүктемені қамтамасыз ету мақсатында электр жүйесі бойынша таратылғанын атап өткім келеді», – деп түйіндеді ол.