QAZAQ GREEN. Қазақстан президенті Қасым-Жомарт Тоқаев Самарқандта өткен «Орталық Азия – Еуропалық Одақ» саммитінде климаттық күн тәртібін өңірлік ынтымақтастықтың басым бағыты ретінде атап өтті, деп хабарлады Ақорда.

Мемлекет басшысы энергетикалық серіктестіктің маңыздылығына тоқталып, Қазақстанның Еуропаға көмірсутек жеткізуші сенімді ел болып қала беретінін, сонымен қатар жаңартылатын энергетика мен экологиялық таза отынды дамытып жатқанын айтты.

«Қазақстан жаңартылатын қуат көздері мен экологиялық таза отын жобаларын жүзеге асыруға кірісті. Total, Eni, Svevind секілді бұрыннан келе жатқан серіктестерімізбен және басқа да еуропалық компаниялармен бірге жел, күн электр стансаларының қуатын арттырып, «жасыл» сутегі өндірісі жобасын қолға алдық», – деді Қасым-Жомарт Тоқаев.

Президенттің айтуынша, Қазақстан, Өзбекстан және Әзербайжан Каспий теңізі арқылы «жасыл» энергияны Еуропа нарығына жеткізетін жаңа электр жеткізу желісін салуға кірісті.

Сонымен қатар Мемлекет басшысы Қазақстан ЕО экономикасы үшін маңызды саналатын 34 шикізат түрінің 19-ын өндіріп отырғанын, соның ішінде уран, литий, мыс және кобальт бар екенін атап өтті. Осыған байланысты президент Астанада Сирек кездесетін металдарды зерттейтін аймақтық орталық құруды ұсынды.

 «Қазақстан декарбонизация бастамаларын белсенді жүзеге асырып келеді. Біз әлемдік ядролық отынның шамамен 40%-ын жеткізіп, таза энергия өндірісінде маңызды рөл атқарып отырмыз», – деді президент.

Сондай-ақ Қасым-Жомарт Тоқаев Қазақстанда Қазақстанда Климаттың өзгеруі және жасыл энергетика бойынша Жобалық кеңсе ашылғаны туралы еске салды. Бұл орталық бүгінде өңірлік экологиялық бастамалардың үйлестіруші алаңына айналуда.