QAZAQ GREEN.  Өңірде энергетикалық инфрақұрылымды жаңғырту және жаңартылатын энергия көздерін дамыту бойынша жүйелі жұмыс жүргізілуде. Бұл бастамалар Қазақстанның жасыл экономикаға көшу тұжырымдамасына сәйкес келеді және өңірдің экологиялық және экономикалық тұрақтылығын қамтамасыз етуге бағытталған, деп хабарлады Ақтөбе хабаршысы.

Ақтөбе облысында алдағы жылдары жалпы қуаты 450 МВт болатын жаңартылатын энергияның бес жобасын іске асыру жоспарлануда. Облыстық энергетика және тұрғын үй-коммуналдық шаруашылық басқармасының деректері бойынша бұл жобалар жеке инвестициялар есебінен іске асырылады және өңірдің энергетикалық тәуелсіздігін арттыруға, сондай-ақ экологиялық жағдайды жақсартуға мүмкіндік береді.

Осылайша, 2025 жылы Хромтау ауданында жалпы қуаты 100 МВт болатын екі жел электр станциясының құрылысы басталады. Бұл жобаларды «Darmen Shuak» ЖШС және «Next Green Energy» ЖШС іске асырады. Жел энергиясын пайдалана отырып өндірілетін электр энергиясы өңірдің халқы мен өндірістік кәсіпорындарының қажеттіліктерін қамтамасыз етуге бағытталады.

Сондай-ақ, облыстың энергетикасын дамыту шеңберінде 2028 жылға қарай 1475 МВт, ал 2030 жылға қарай 1535 МВт көлемінде электр энергиясын өндіруді ұлғайту жоспарлануда. Бұл өңірдің өндірістік әлеуетінің өсуін қамтамасыз етуге мүмкіндік береді.