QAZAQ GREEN.  2025 жылдың бірінші жартыжылдығында жел энергетикасының әлемдік секторы 2024 жылдың ұқсас кезеңімен салыстырғанда енгізілген қуаттардың көлемі 64%-ға ұлғайған сенімді өсуін көрсетті. Дүниежүзілік жел энергетикасы қауымдастығының (WWEA) деректері бойынша, 2025 жылдың қаңтарынан маусымына дейін әлемде бір жыл бұрынғы 44,1 ГВт-қа қарсы 72,2 ГВт жаңа қуат енгізілді.

Он екі айда, 2024 жылдың шілдесінен 2025 жылдың маусымына дейін, жаһандық қондырғылар 148 ГВт құрап, жел энергетикасының жиынтық қуатын 1 245 ГВт-қа (1,25 ТВт) дейін жеткізді. Бүгінде жел энергетикасы электр энергиясына әлемдік сұраныстың шамамен 12%-ын қамтамасыз етеді, бұл 13,5% деңгейінде жыл сайынғы өсімді көрсетеді.

Мұндай өсудің негізгі қозғалтқышы бірінші жартыжылдықта 51,4 ГВт қосқан Қытай болып қала береді – бұл бір жыл бұрынғы көрсеткіштен екі есе көп. Басқа жетекші нарықтардың қатарына Үндістан (3,5 ГВт), АҚШ (2,1 ГВт), Германия (1,9 ГВт), Франция (1,7 ГВт) және Бразилия (1,3 ГВт) кіреді. Бразилия әлемдегі жел энергетикасының бесінші ірі нарығы позициясын нығайтты, ал Түркия он бірінші орынмен Италияны басып озды.

WWEA болжамы бойынша, 2025 жылдың соңына қарай әлемдік жел энергетикасының жиынтық белгіленген қуаты 1 320 ГВт-тан асады, ал жаңа қондырғылардың жалпы көлемі рекордтық 150 ГВт-қа жетеді. Өсім негізінен 2024 жылғы мерзімі ауыстырылған жобалардың аяқталуымен және елдердің «жасыл» энергетикаға жедел көшуі жағдайында инвестициялардың жандануымен қамтамасыз етілді.

«2025 жылдың бірінші жартысы жел энергетикасы үшін маңызды кезең – рекордтық өсу және жаңартылатын энергияға деген сенімді растау уақыты болды», – деп атап өтті WWEA президенті, доктор Ирфан Мирза. – Жел энергетикасы – бұл тек технологиялық шешім емес, планетаның болашағы үшін моральдық қажеттілік».

Жел энергетикасы бойынша 22-ші Дүниежүзілік конференция (WWEC2025) 2025 жылғы 3-5 желтоқсан аралығында Шаньтоу қаласында (Қытай) өтеді және қоғамдық қатысу, инклюзивті өсу және энергетикалық саясаттағы халықаралық ынтымақтастық мәселелеріне арналады.