QAZAQ GREEN.  Orlen компаниясы Балтық теңізіндегі Польшаның алғашқы теңіз жел электр станциясының құрылысын аяқтауға жақындады. Baltic Power жобасында 76 турбинаның 50-і орнатылды.

Baltic Power жобасын Orlen және Northland Power компаниялары бірлесіп жүзеге асырып жатыр, деп хабарлайды Польша радиосы.

Станция жылына шамамен 4 ТВт·сағ электр энергиясын өндіреді. Бұл Польшаның қазіргі электр энергиясына деген сұранысының шамамен 3%-ына тең.

Қалған турбиналарды орнатумен қатар, теңіздегі және құрлықтағы инфрақұрылымды ұлттық электр желісіне біріктіру жұмыстары жүргізілуде. Сондай-ақ электр энергиясын сынақ режимінде беру жоспарланған.

Балтық теңізіндегі бұл жел электр станциясы әлемде алғашқылардың бірі болып Vestas компаниясы шығаратын қуаты 15 МВт болатын турбиналарды пайдаланады. Нысан Хочево мен Леба қалаларының маңындағы жағалаудан шамамен 23 шақырым қашықтықта орналасқан.

Құрылыс толық аяқталғаннан кейін станцияның белгіленген қуаты шамамен 1,2 ГВт болады және жыл сайын 4 ТВт·сағ-қа дейін электр энергиясын өндіреді.