QAZAQ GREEN.  Қазақстан Президенті Қасым-Жомарт Тоқаев Нью-Йорктегі ірі америкалық компаниялардың басшыларымен кездесті, деп хабарлады Ақорданың баспасөз қызметі.

Мемлекет басшысының Нью-Йоркке сапары жаһандық қаржы институттарының, соның ішінде Citi, Goldman Sachs, NASDAQ, Auerbach Grayson & Company LLP, Franklin Templeton, Brightlight Capital, AllianceBernstein, Jefferies Financial Group, Luxor Capital Group, Paine Schwartz Partners LLC, New Silk Road Forum, Robotti & Company Advisors, TPG Capital, Grupo Los Grobo тәрізді компаниялардың басшыларымен жұмыс таңғы ас форматындағы кездесуден басталды.

Сапар аясында Қасым-Жомарт Тоқаев қаржы, энергетика, ауыл шаруашылығы, өнеркәсіп, көлік, ақпараттық технологиялар, білім беру және басқа да салалардағы америкалық ірі компаниялардың басшыларымен бірқатар кездесулер өткізді. Сондай-ақ, Мемлекет басшысы қазақ-американ инвестициялық дөңгелек үстелінің жұмысына қатысты.

Президент еліміздің энергетика, көлік және логистика, ауыл шаруашылығы, «жасыл» экономика салаларындағы зор әлеуетіне назар аударды, сондай-ақ «Астана» халықаралық қаржы орталығында жасалған жағдайларды атап өтті. 

«2030 жылға қарай біз энергетикалық теңгерімдегі ЖЭК үлесін қазіргі 4-тен 15%-ға дейін арттыруда серпіліс жасауға ниеттіміз. Желдің, күннің сапасы және жердің қолжетімділігі бізді осы салада көшбасшы ете алады. Климаттың өзгеруіне қарсы күреске өз үлесімізді қосудамыз», - деді Қасым-Жомарт Тоқаев.