QAZAQ GREEN.  Қытайға ресми сапармен барған Қазақстан президенті Қасым-Жомарт Тоқаев пен ҚХР Мемлекеттік Кеңесінің бірінші вице-премьері Дин Сюэсян бейнеконференциябайланыс арқылы Жамбыл облысындағы жел энергетикасына арналған қосалқы бөлшектер өндіретін бірінші кешенді салтанатты түрде ашу рәсіміне қатысты.

Мемлекет басшысы сапары аясында Қытайлық Sany Group Co. Ltd. корпорациясы директорлар кеңесінің төрағасы Сян Вэньбомен екіжақты ынтымақтастықтың болашағын талқылау үшін кездесті, деп хабарлайды президенттің баспасөз қызметі.

Келіссөздің негізгі тақырыбы «жасыл» энергетика және машина жасау салаларында бірлескен жобаларды дамыту болды. Тараптар сондай-ақ ғылыми-зерттеу жұмыстары және инновациялық технологиялар бойынша серіктестік мәселелерін қозғады.

Ашылған зауыт осы ынтымақтастықтың нақты көрінісі болып табылады. Бұл Қазақстандағы мұндай алғашқы зауыт. Өндірістік база Шу қаласындағы «Жібек жолы» арнайы экономикалық аймақта орналасқан. Кәсіпорын гондолалар, қасықшалар, мұнаралар және жел электр станцияларына арналған өзге де негізгі қосалқы бөлшектерді шығарады. Жобаны іске асыру Қазақстанда жаңа ЖЭС салуды қамтамасыз етеді және елдің «жасыл» энергетикасын дамытуға салмақты үлес қосады.

Мемлекет басшысы Sany Group корпорациясының Қазақстан нарығындағы қызметін кеңейту ниетін жоғары бағалап, бұл кәсіпорынның қазақстандық-қытайлық ынтымақтастықты нығайтудағы маңызды кезең болатынын атап өтті. Қытайлық компания республикада арнайы техникалардың озық өндірісін құруды жоспарлап отыр.

Сян Вэньбо қытайлық корпорацияның Қазақстандағы жұмыс жоспарымен таныстырды. Атап айтқанда, Sany Group компаниясы қуаттылығы 1 ГВт болатын жел электр стансасын салып жатыр.