QAZAQ GREEN. 2026 жылғы 27 сәуірде Қазақстан Республикасының Бірыңғай электр энергетикалық жүйесінің (БЭЖ) Батыс аймағы (Атырау облысы) үшін жалпы белгіленген қуаты 250 МВт болатын жел электр станциясын салуға арналған жаңартылатын энергия көздері жобаларын іріктеу бойынша еркін аукциондық сауда-саттық өтті.

Еркін аукциондық сауда-саттық аясында жүзеге асырылатын жел электр станцияларын салудың негізгі шарттарының бірі – оларды объектінің белгіленген қуатының кемінде 30%-ына тең қуатқа ие және осы қуатты кемінде екі сағат бойы беруді қамтамасыз ететін электр энергиясын сақтау жүйелерімен жабдықтау болып табылады.

Аукциондық сауда-саттыққа 2 компания қатысуға жіберілді.

Сауда-саттық сессиясы барысында қатысушылар тарапынан 16 баға ұсынысы берілді. Ұсынылған өтінімдердің жиынтық көлемі 500 МВт-ты құрады.

Аукцион қорытындысы бойынша жеңімпаз болып «Батыс Каспий Энерго» ЖШС танылды. Жобаның белгіленген қуаты – 250 МВт, аукциондық баға – 22,32 теңге/кВтсағ (ҚҚС-сыз).

Бақылаушылар ретінде Қазақстан Республикасы Президенті Әкімшілігінің, Қазақстан Республикасы Ұлттық экономика министрлігінің Табиғи монополияларды реттеу комитетінің, Қазақстан Республикасы Энергетика министрлігінің, «Қазақстан электр энергетикалық қауымдастығы» ЗТБ, «Қазақстанның жаңартылатын энергетика қауымдастығы» ЗТБ, «Qazaq Green» ЖЭК қауымдастығы» ЗТБ өкілдері қатысты.

Бақылаушылар «KOREM» АҚ оператор болып табылатын электрондық сауда жүйесінің ашықтығы мен жұмысының дұрыстығын растады.