2026 жылдан бастап экономикалық қызмет түрлері және басқа да парниктік газдар шығарындыларының сауда жүйесін кеңейту жоспарлануда. Бұл туралы ҚР Экология, геология және табиғи ресурстар министрі Серікқали Брекешев хабарлады, деп мәлімдейді «ҚазАқпарат» ХАА.

«Қазіргі уақытта бүкіл әлем жаһандық климаттың өзгеру қаупінің алдында тұр. Климаттың өзгеруі энергетиканы дамыту саласындағы әлемдік саясатқа әсер етті. Көмір саласына экономикалық қысым күшейе түсуде. Ірі қаржы институттары көмірмен байланысты жобалардан жасыл технологиялардың пайдасына толық бас тартты. Бұл жаңартылатын энергия көздері технологияларының бәсекеге қабілеттілігіне оң әсерін тигізді. ЖЭК нысандарын салу және пайдалану құны соңғы 10 жылда үш есеге төмендеді», - деді ҚР Экология министрі «ECOJER» ІІ Халықаралық экологиялық конгресінде.

Оның айтуынша, бүгінгі таңда әлемнің ірі экономикаларын көміртексіздендірудің тұрақты үрдісі байқалады.

«Көміртегі бейтараптығы және тиісінше көмірден бас тарту жөніндегі мақсаттар туралы мәлімдеген елдердің саны жыл сайын артып келеді. Бұл бастамаға Қазақстан да қосылды. Бүгінде Мемлекет басшысының тапсырмасы бойынша 2060 жылға дейін көміртегі бейтараптығына қол жеткізу стратегиясын пысықтау, сондай-ақ Париж келісімі шеңберінде ұлттық деңгейде айқындалатын үлесті жаңарту бойынша жұмыс жүргізілуде. Шығарындылардың нөлдік теңгеріміне қол жеткізу үшін ЖЭК пайдалануды кеңейту, энергия тиімділігін арттыру және биоотын мен сутекке көшу бөлігінде айтарлықтай өзгерістер күтілуде», - деп түсіндірді ведомство басшысы.

Серікқали Брекешев атап өткендей, Париж келісімі бойынша міндеттемелерге қол жеткізу құралдарының бірі шығарындылар саудасы жүйесі болып табылады. Бұл парниктік газдар шығарындыларын азайтудың нарықтық тетігі болып саналады.

ҚР Экология министрлігі еуропалық және қазақстандық жүйелерді жақындастыру жұмыстарын бастап кетті. 2026 жылдан бастап экономикалық қызмет түрлері және басқа да парниктік газдар бойынша жүйені кеңейту жоспарлануда.

«Париж келісімі бойынша міндеттемелерді орындаумен қатар, бұл біздің экспорттаушылардың ЕО-да шекаралық көміртегі салығын толық төлеуіне жол бермейді», - деп толықтырды министр.