QAZAQ GREEN. Атырауда «ҚазМұнайГаз» ҰК» АҚ еншілес компаниясы – «ҚМГ Инжиниринг» ЖШС базасында «жасыл» сутегін өндіру жөніндегі пилоттық жобаның бірінші кезеңі аяқталды. Жоба қазақстандық Green Spark компаниясымен серіктестікте жүзеге асырылуда, деп хабарлайды ҚМГ.

Бірінші кезеңде жалпы қуаты 200 кВт болатын 336 күн панелі орнатылды, бұл зертханалық корпустың энергия тұтынуын ішінара қамтамасыз етуге және жыл сайын электр энергиясына шамамен 12 млн теңгені үнемдеуге мүмкіндік берді.

Келесі қадам – өндірілген күн энергиясының көмегімен суды сутегі мен оттегіге бөлетін электролизерді монтаждау. Осылайша, нысанда энергия өндіруден бастап жылыту және энергиямен қамтамасыз ету үшін сутегі өндіруге дейінгі тұйық цикл құрылады.

Жоба сондай-ақ зерттеу функциясын орындайды – бұл Батыс Қазақстан жағдайында сутегі энергетикасы технологияларын сынақтан өткізуге мүмкіндік береді. Табысты тәжірибені 2060 жылға дейінгі төмен көміртекті даму бағдарламасы шеңберінде ҚМГ басқа объектілеріне енгзілуі мүмкін.