QAZAQ GREEN. Орнатылған қуаты 20 МВт болатын биомассалық электр станциялары (БиоЭС) жобаларын іріктеу бойынша қайталама аукциондық сауда-саттық 2026 жылғы ақпан айында өтеді.

«KOREM» АҚ-тың хабарлауынша, 2025 жылғы 12 қарашада болған аукциондық сауда-саттық өткізілмеді деп танылған. Сауда-саттыққа қатысуға тек бір ғана компания жіберілген, бұл аукциондық сауда-саттықты ұйымдастыру және өткізу қағидаларының талаптарына сәйкес келмейді. Аталған қағидаларға сәйкес, аукциондық сауда-саттыққа қатысу үшін өтінім берген қатысушылар саны кемінде екі болуы тиіс. Нәтижесінде аукцион қорытындысы бойынша жеңімпаз анықталған жоқ.

Осыған байланысты, Қазақстан Республикасы Энергетика министрлігінің хабарландыруына сәйкес, БиоЭС жобаларын іріктеу бойынша қайталама аукциондық сауда-саттық 2026 жылғы 10 ақпанда сағат 15:00-де өткізіледі.

Аукциондық сауда-саттықтың ұйымдастырушысы ретінде «KOREM» АҚ құжаттарды қабылдау және өтінім берушілерді тіркеу қолданыстағы қағидаларға сәйкес жүзеге асырылатынын нақтылады. Құжаттарды қабылдау аукцион өтетін күнге дейін 30 күнтізбелік күн бұрын басталып, сауда-саттық басталуына 5 жұмыс күні қалғанда аяқталады.