QAZAQ GREEN.  Әзербайжан 2027 жылдың соңына қарай жаңартылатын энергия көздерінің (ЖЭК) елдегі жалпы белгіленген электр генерациясы қуатындағы үлесін 34 пайызға дейін жеткізуді жоспарлап отыр. Бұл туралы Әзербайжан энергетика министрінің орынбасары Эльнур Солтанов Баку климаттық іс-қимыл апталығы 2026 (BCAW 2026) аясындағы панельдік пікірталаста мәлімдеді, деп хабарлайды Report.az.

Қазіргі уақытта ЖЭК-тің белгіленген қуаттағы үлесі 21 пайызды құрайды. Министр орынбасарының айтуынша, биыл жаңартылатын энергия көздерінен өндірілетін электр энергиясының көлемі өткен жылмен салыстырғанда екі есеге жуық артады.

«Қазірдің өзінде ел аумағында өңірдегі ең ірі күн және жел электр станциялары жұмыс істеп тұр. Аумағы мен экономикасының көлемі салыстырмалы түрде шағын болғанына қарамастан, Әзербайжан жасыл энергетикаға көшу бағытында өңірлік көшбасшы болуға ұмтылып отыр», деді Эльнур Солтанов.

Оның айтуынша, Әзербайжандағы парниктік газдар шығарындыларының құрылымы әлемдік көрсеткіштерге ұқсас. Жалпы шығарындылардың шамамен 70 пайызы энергетика секторына тиесілі. Қалған 30 пайызға жуық шығарындылар өнеркәсіп, қалдықтарды басқару және ауыл шаруашылығы салаларынан келеді.

Министр орынбасары елдің қазіргі энергетикалық теңгерімі мемлекеттік саясаттың жоспарлы түрде жүзеге асырылуының нәтижесі екенін атап өтті. Оның сөзінше, Әзербайжанда табиғи газ өндіру көлемі ұлғайып, мұнай өндіру біртіндеп қысқарып келеді.

Солтанов табиғи газды ұтымды пайдалану жаһандық климаттық сын-қатерлерді еңсеруге ықпал ететін құралдардың бірі бола алатынын айтты. Сонымен қатар ол Әзербайжанның Еуропа мен әлемдегі энергетикалық қауіпсіздікті қамтамасыз етудегі рөлін атап өтіп, елдің мұнай-газ саласындағы тарихи тәжірибесімен қатар, жасыл энергетикаға көшуге басымдық беріп отырғанын айтты.