QAZAQ GREEN. «Юнигрин Энерджи» компаниясы Қалмақия Республикасының Лаган ауданында орналасқан, қуаты 63 МВт Красин күн электр станциясын (КЭС) сәтті іске қосты, деп хабарлады Neftegaz.RU ақпарат агенттігі компанияның баспасөз қызметіне сілтеме жасап.

Аталған жобаның инвестициясы 6 млрд рубльден асты. Осы күн электр станциясының іске қосылуымен Қалмақиядағы күн генераторларының жалпы орнатылған қуаты 297 МВт-қа жетті. Бұл көрсеткіш республикаға Ресей өңірлері арасында алдыңғы орындардың бірін иеленуге мүмкіндік береді.

Қалмақияның Тұрғын үй-коммуналдық шаруашылық және энергетика министрлігінің мәліметінше, Красин КЭС өңірдегі төртінші күн электр станциясы болып табылады. Ол бұған дейін іске қосылған Малодербетовск КЭС (60 МВт), Яшкуль КЭС (58,5 МВт) және елдегі ең ірі Аршан КЭС-ке (115,6 МВт) қосылды. Бұл қуаттылық күн энергиясының Қалмақияның энергетикалық жүйесіндегі үлесін 55,6%-ға дейін арттырды.

Красин КЭС шамамен 180 гектар аумақты алып жатыр және Ресейде шығарылған150 мыңнан астам екіжақты күн модулін, сондай-ақ 800 шақырымнан астам кабельдік желілерді қамтиды. Жылдық электр энергиясын өндіру көлемі 99,6 млн кВт-сағатты құрайды деп болжанып отыр. Бұл жылына көмірқышқыл газының шығарылуын 35 мың тоннаға азайтуға мүмкіндік береді.

Жаңа күн электр станциясы күннің қозғалысын бақылайтын трекерлік жүйені пайдаланады, бұл электр энергиясын өндіруді бекітілген модуль бұрыштарымен салыстырғанда орта есеппен 20-25%-ға арттырады. Құрылыс барысында шамамен 100 уақытша жұмыс орны құрылды, ал станцияны тұрақты пайдалану және қорғау үшін шамамен 20 қызметкер жұмыс істейтін болады.

Сонымен қатар, «Юнигрин Энерджи» қуаты 63 МВт болатын Лаган күн электр станциясы жобасын іске асыруды жалғастыруда. Оны 2025 жылдың соңына дейін аяқтау жоспарланып отыр. Бұл станция Красин КЭС-ның  жанында орналасады.