QAZAQ GREEN.  Қытай ғалымдары судың күн арқылы буланып тұщыландырылу тиімділігін айтарлықтай арттыратын жаңа буынның үш өлшемді фототермиялық құрылымын жасап шығарды. Зерттеу Advanced Materials журналында жарияланды.

Әзірлеме Қытай ғылым академиясының Процестер инженериясы институты мен Шэньчжэнь университетінің мамандарына тиесілі. Жаңа құрылым полимер тізбектерін қуыс көпқабатты қабықшалармен біріктіреді, бұл буланудың рекордтық жылдамдығына — сағатына шаршы метрге 38,14 кг — қол жеткізуге мүмкіндік берді. Бұл көрсеткіш екі өлшемді мембраналық жүйелердің нәтижесінен 8,5 есе жоғары.

Зерттеу жетекшісі профессор Ван Данның айтуынша, материалдың «нанoorман» тәрізді бірегей микроқұрылымы күн сәулесін барынша тиімді ұстайды, ал нанотежеу әсері буланудың энергия шығынын 45,7%-ға азайтады.

Сынақтар барысында ашық аспан астында табиғи күн жарығымен жұмыс істейтін 0,75 шаршы метрлік қондырғы тәулігіне 20,16 литр тұщы су өндірді. Судың сапасы ДДҰ ауыз су стандарттарына сай келеді, ал өндірілетін көлем шамамен он адамның күнделікті базалық қажеттілігін өтеуге жеткілікті.

Тұщыландырылған су сонымен қатар 5 шаршы метрлік тәжірибелік алқапты суару үшін қолданылды. Жүйе шпинат, жүгері және қытай қырыққабатының толық өсу циклін қамтамасыз етті, бұл оның су тапшы аймақтардағы ауыл шаруашылығы суармасы үшін әлеуетін растайды.

Әзірлеме экономикалық тұрғыдан да перспективалы: зерттеушілердің есебінше, екі жыл пайдаланудан кейін өндірілетін судың құны бөтелке суының бағасынан төмен болады. Ұзақ мерзімді тұрақты жұмыс жағдайында технология тұщы су тапшылығы мәселесінің практикалық шешіміне айналуы мүмкін.