QAZAQ GREEN. Өзбекстан Республикасының президенті Шавкат Мирзиёев «Абу-Даби тұрақты даму апталығы» саммитінде сөз сөйлеп, елдің энергетика саласындағы жетістіктері мен жоспарлары туралы баяндады, деп хабарлайды Өзбекстан президентінің ресми сайты.

«Соңғы 5 жылда энергетика саласына 20 миллиард АҚШ долларына жуық шетелдік инвестиция тартылды. Біз жалпы қуаты 9,6 гигаватт болатын заманауи энергетикалық нысандарды іске қостық. Атап айтқанда, қуаты 3,5 гигаватт болатын 14 күн және жел электр станциясы, сондай-ақ жалпы қуаты 300 мегаватт болатын екі энергия сақтау жүйесі құрылды», – деді Өзбекстан басшысы.

Шавкат Мирзиёевтің айтуынша, қазіргі уақытта Өзбекстан шетелдік серіктестермен бірге жалпы қуаты 24 гигаватт болатын 50-ден астам ірі жобаны жүзеге асыруда. Бұл жобалардың жалпы құны 26 миллиард доллардан асады.

Президенттің маңызды мәлімдемелерінің бірі – Өзбекстанда жаңартылатын энергия көздерінің үлесін арттыру туралы уәдесі.

«2030 жылға қарай жаңартылатын энергия көздерінің үлесін 54 пайызға жеткізуді жоспарлап отырмыз», – деді ол.

Сонымен қатар, Шавкат Мирзиёев Біріккен Араб Әмірліктерімен ынтымақтастықты жоғары бағалап, оларды жаңартылатын энергия саласындағы «сенімді және стратегиялық серіктес» деп атады. Президенттің айтуынша, БАӘ-мен бірлескен жобалардың инвестициялық портфелі 26 миллиард доллардан асты.

Шавкат Мирзиёев Masdar компаниясымен сәтті жүзеге асқан жобаларды мысалға келтірді. Олардың аясында жалпы қуаты 1,5 гигаватт болатын 5 энергия өндіру нысаны іске қосылды. Алдағы жылдары осы серіктеспен бірге қуаты 1,6 гигаватт болатын үш жаңа жоба жүзеге асырылып, 520 мегаватт-сағат энергия сақтау жүйелері салынатын болады.