QAZAQ GREEN. 2023 жылғы 13 қарашада Қазақстан Республикасының жиынтық белгіленген қуаты 100 МВт бірыңғай энергожүйесінің Солтүстік аймағы үшін ЖЭК жел энергетикалық станцияларының жобаларын іріктеу бойынша аукциондық сауда-саттық басталды.

ҚР Энергетика министрлігі бекіткен ЖЭС жобаларын іріктеу бойынша аукциондық сауда-саттықты өткізу кезіндегі шекті аукциондық (бастапқы) баға 2023 жылы 22.68 тг/кВтсағ (ҚҚС-сыз) құрады.

Аукциондық сауда-саттыққа қатысуға 6 компания жіберілді, сауда-саттық сессиясын өткізу барысында қатысушылар 18 баға ұсынысын берді. Берілген өтінімдердің жиынтық көлемі 450 МВт құрады.

«ЖЭК жобаларын іріктеудің аукциондық тетігі «жасыл» энергетиканы дамыту үшін неғұрлым пәрменді, түсінікті және транспарентті құрал болып табылады. Осы жылдар ішінде аукциондарға 13 елден 230-дан астам компания қатысты. Бүгінде ЕҚДБ, АДБ, Дүниежүзілік банк, БҰҰДБ сияқты халықаралық ұйымдар біздің аукциондарды мойындады. ЖЭК аукциондары болашақта да дамиды деп үміттенеміз», - деп атап өтті «Qazaq green» ЖЭК қауымдастығының Басқарма төрайымы Айнұр Соспанова.

Аукциондық сауда-саттыққа қатысушылар арасында аукциондық сауда-саттықта бәсекелестік күресті жүргізу барысында өтінімдердің баға ауқымының 22.68-ден 10.5 тг/кВтсағ (ҚҚС-сыз) дейін төмендеуі алынды.

ЖЭС құрылысына жобаларды іріктеу бойынша шекті аукциондық бағадан бағаның рекордтық 54%-ға төмендеуі байқалады.

«САНГРОУ КАЗАХСТАН ХОЛДИНГС» ЖШС компаниясы аукциондық сауда-саттық қорытындысы бойынша жеңімпаз болып анықталды, жобаның белгіленген қуаты 100 МВт, аукциондық баға - 10.5 тг/кВт*сағ (ҚҚС-сыз). Жобаны Қостанай облысында орналастыру жоспарлануда.

Аукциондық сауда-саттықты ұйымдастыру мен өткізу қағидаларының талаптарын сақтау мақсатында бақылаушылар ретінде Қазақстан Республикасы Энергетика министрлігінің, «Атамекен» ҰКП, «Қазақстан электр энергетикалық қауымдастығы» ЗТБ, «Qazaq Green» ЖЭК қауымдастығы ЗТБ өкілдері қатысты.

«Qazaq Green» ЖЭК қауымдастығының Директорлар кеңесінің төрағасы Нұрлан Қапенов: «Бүгін, 13 қарашада өткен аукциондық сауда-саттық ЖЭК жобаларын іске асыруға рекордтық төмен тарифті көрсетті - $0,023/кВт*сағ. Дәстүр бойынша біз күн энергетикасы бойынша аукциондық бағалардың айтарлықтай төмендегенін көрдік, алайда соңғы уақытта әлемде желмен жұмыс істейтін технологиялар мен өндірістік қуаттардың дамуы осындай нәтиже беруде,» - деп атап өтті. 

Белгіленген жиынтық қуаты 100 МВт жел энергетикалық станциясының жобаларын іріктеу бойынша келесі аукцион 2023 жылғы 14 қарашаға тағайындалды.

Анықтама үшін:

Қазақстанда жаңартылатын энергия (ЖЭК) бойынша аукциондық сауда-саттық жасыл энергетиканы дамытудың негізгі тетігі болып табылады. Энергетика министрлігінің қолдауымен ұйымдастырылған бұл сауда-саттық ЖЭК-тің, атап айтқанда жел энергетикалық станцияларының тиімді жобаларын таңдауға бағытталған. Шекті аукциондық бағаларды енгізу елдегі жаңартылатын энергия өндірісінің құнын төмендетуге және экологиялық тұрақты энергетикалық жобаларға инвестициялар тартуға ықпал ете отырып, қатысушылар арасындағы бәсекелестікті ынталандырады.

ҚР Энергетика министрінің 2023 жылғы 23 мамырдағы № 187 бұйрығымен бекітілген 2023 жылға арналған аукциондық сауда-саттықты өткізу кестесіне сәйкес 2023 жылы ЖЭК жобаларын іріктеу бойынша аукциондық сауда-саттықтың белгіленген қуаттарының жалпы көлемі 860 МВт құрайды, оның ішінде:

- күн электр станциялары (КЭС) - 100 МВт;

- жел энергетикалық станциялары (ЖЭС) - 500 МВт;

- гидроэлектр станциялар (ГЭС) - 250 МВт;

- биоотын электр станциялары (БиоЭС) - 10 МВт.