QAZAQ GREEN. Мәжіліс отырысында Қазақстан Үкіметі мен Франция Үкіметі арасындағы жаһандық жылынуға қарсы күрес саласындағы ынтымақтастықты іске асыру туралы арнайы келісім ратификацияланды.

Бұл келісімнің негізгі мақсаты жаһандық жылынуға қарсы күресте екі ел арасындағы ынтымақтастық болып табылады. Ол Қазақстан аумағында жаңартылатын энергия көздері және тұрақты даму саласындағы ірі жобаларды ілгерілетуді, әзірлеуді және іске асыруды көздейді. Атап айтқанда, француз инвесторы Жамбыл облысында жел электр станциясын салуды жоспарлап отыр.

«Келісім шеңберінде Жамбыл облысы, Мирный кентінің маңында жалпы қуаты 1 ГВт жел энергиясын пайдаланатын жел электр станциясының жобасын (бұдан әрі – жоба) салу жоспарлануда», – деді энергетика министрі Алмасадам Сәтқалиев.

Естеріңізге сала кетейік, өткен жылдың желтоқсан айында «Самұрық-Қазына» қоры француздық Total Open компаниясымен Қазақстанда қуаты 1 ГВт және құны 1,9 млрд АҚШ долларын құрайтын электр энергиясын жинақтау жүйесі бар жел паркін құру туралы уағдаласты. Электр станциясын 2026-2027 жылдары Жамбыл облысында іске қосу жоспарланып отыр.

Энергетика министрі Алмасадам Сәтқалиев энергияның барлық баламалы көздері экологияға пайда әкелетінін атап өтті. Ол мұндай электр станциясы апатқа ұшыраған жағдайда да атмосфераға зиянды шығарындылар болмайтынына сенім білдірді.

«Жел немесе кез келген басқа балама электр станциясындағы апат оның иелерінің материалдық шығындарына ғана әкеледі, бірақ жаһандық экологиялық апатқа себеп болмайды», – деп атап өтті министр.

Энергия жүйесінің қауіпсіз жұмысын қамтамасыз ету үшін инвестор жоба шеңберінде электр энергиясын сақтау тетігін іске асырады. Бұл жобаны іске асыру жаңартылатын энергия көздері секторын дамытуды жалғастырып қана қоймай, Қазақстанға тұрақты даму саласындағы мақсаттарға қол жеткізуге көмектеседі. Жоба сонымен қатар 820 миллиард теңге көлемінде инвестиция тартады, жаңа жұмыс орындарын ашады және көмірқышқыл газының шығарындыларын азайтады.

«Жобаны іске асыру шеңберінде 250-ге дейін тұрақты жұмыс орны, 2500-ге дейін уақытша жұмыс орны құрылады, шамамен 820 млрд. теңге инвестиция тартылады, сондай-ақ қосымша 3,6 млрд. кВтсағ жасыл энергия өндіріледі. Жоба инвестордың қаражаты есебінен іске асырылады», – деді Алмасадам Сәтқалиев.

Заң Сенаттың қарауына жіберілді.