QAZAQ GREEN. Қазақстан президенті Қасым-Жомарт Тоқаев Nebras Power компаниясы директорлар кеңесінің төрағасы Мұхаммед Нассер Әл-Хаджриді қабылдады, деп хабарлайды Ақорда.

Кездесуде энергетика саласындағы ынтымақтастықтың перспективалары және жаңартылатын энергия көздеріне инвестиция тарту мәселесі талқыланды.

Қасым-Жомарт Тоқаев Қазақстанның көміртегі бейтараптығына қол жеткізуге баса мән беретінін айтты. Осыған орай Мемлекет басшысы Nebras Power компаниясының елімізде жаңартылатын энергия көздерін дамытуға қызығушылық танытып отырғанын жоғары бағалады.

Өз кезегінде Мұхаммед Нассер Әл-Хаджри құрмет көрсеткені үшін Қасым-Жомарт Тоқаевқа алғыс айтты. Сондай-ақ «Самұрық-Қазына» акционерлік қоғамымен бірлесіп, Қазақстанда су-энергетика жобасын жүзеге асыруға қатысты жоспарын жеткізді. Бүгін мүдделі тараптар арасында тиісті келісімге қол қойылды.

Сонымен қатар әңгімелесу барысында энергетика секторында метан қалдықтарын азайту жөніндегі ынтымақтастық мәселелері талқыланды.

Президент Nebras Power компаниясы директорлар кеңесінің төрағасын алдағы уақытта өтетін Астана халықаралық форумына қатысуға шақырды. Жиын аясында аса маңызды өңірлік және жаһандық мәселелер талқыланады.

Қазақстанның бір триллион-киловатқа бағаланған жаңартылатын энергия көздерінің әлеуеті осы саладағы жаһандық ойыншылардың назарын аударды. Жалпы алғанда, олар 43 гигаватт қуат өндіретін бірнеше жобаны жүзеге асыруға міндеттеме алды. 

«Nebras Power компаниясының Қазақстанда қуаты 350 мегаватт болатын су электр станциясын салу ниетін, сондай-ақ Pearl Overseas компаниясының қуаты 1,1 гигаватт болатын бу-газ қондырғысын орнату жоспарын жоғары бағалаймыз. Біз осы аса маңызды сектордағы өндіріс, технология трансферті және тәжірибе алмасу бағыттары бойынша серіктестікті жалғастыруға мүдделіміз», – деді президент қазақ-қатар инвестициялық дөңгелек үстелі өтіп жатқан кезде.

.