QAZAQ GREEN.  Жетісу облысында Басқан өзенінде ГЭС тізбесі салынуда, деп хабарлайды «24KZ».

Алдағы екі жылда екі су электр станциясы іске қосылады. Алғашқы станция 9 жыл бұрын салынған. Мамандардың есептеулері бойынша, екінші және үшінші кезектің іске қосылуымен электр энергиясын өндіру жиынтық қуатында жылына 90 млн кВт/сағ құрайды.

Басқан өзеніндегі екінші гидроэлектр станциясы бес жыл бұрын салына бастады. Қазір 70% жұмыстар аяқталды. Жоба бойынша судың негізгі бөлігі құбыр арқылы объектіге түседі. Басқан – Жетісу облысының таулы өзендерінің бірі. Мамандардың айтуынша, су көлемі электр энергиясын үздіксіз өндіру үшін жеткілікті.

 »Мамырдан қарашаға дейін су өте көп. Бұл бізге жеткілікті, сондықтан 50%-ын халыққа беретін боламыз», – деді мердігер компанияның өкілі Еркінбек Андағұлов.

Қазір нысанда 250 адам жұмыс істейді. Құрылыс аяқталғаннан кейін жазға қарай мұнда 25 жергілікті тұрғын жұмысқа орналасады. Қазір олар арнайы оқу курстарынан өтіп жатыр.

«Мердігерлер ауылдың көптеген проблемаларын шешуге көмек көрсетуге уәде берді: бақшаларды суару үшін арық желісін жөндеу, жол төсемін қайта жаңарту, ең бастысы – біздің ауыл тұрғындарын жұмысқа қабылдау», – деп атап өтті Екіаша ауылының тұрғыны Серғазы Сарыбаев.

Алдағы жылдары тек Басқан өзенінде бес шағын ГЭС-ті іске қосу жоспарлануда, сондай-ақ шамамен 3,5 мың гектар жерді суармалы сумен қамтамасыз ететін бөгет салынады.

«Біздің аудан үшін шағын энергетиканы дамыту – басым бағыт. Осы ГЭС іске қосылғаннан кейін біз тағы екеуін салуды жоспарлап отырмыз. Қазір Черкас ауылдық округінде гидроэлектр станциясын жобалау жұмыстары жүргізілуде. Бұл құны 8-ден 15 млрд теңгеге дейінгі ірі жобалардың бірі», – деді аудандық кәсіпкерлік бөлімінің басшысы Дидар Сағынғали.

 »Биыл өңірде төрт жаңа гидроэлектр станциясы іске қосылады. Олардың жиынтық қуаты – 46 МВт. Ал алдағы екі жылда Жетісу облысында жаңартылатын энергия көздерінің тағы 7 нысаны пайда болады», – деп қорытындылады тілші Гүлнар Жантасова.