QAZAQ GREEN. Орталық Азияда 33 жоба мен 47 ұйым «Горизонт Еуропа» бағдарламасы және оның алдындағы «Горизонт 2020» бағдарламасы аясында қаржыландыруды алды.

«Горизонт Еуропа» – бұл Еуропалық одақтың (ЕО) 95,5 миллиард еуро бюджеті бар зерттеулер мен инновациялар саласындағы тоғызыншы негіздемелік бағдарламасы. Ол климаттың өзгеруі, энергетикалық қауіпсіздік және мобильділік сияқты жаһандық проблемаларды шешуге бағытталған.

Бағдарламаға қатысу ғалымдар мен зерттеушілерге:

· Соңғы білім мен зерттеу нәтижелеріне қол жеткізуге;

· Өз мақсаттарына тезірек жетуге;

· Байланыс желісін кеңейтуге;

· Халықаралық жобаларға қатысуға мүмкіндік береді.

«Бағдарламаға кез келген елдің ұйымдары қатыса алады, бірақ олар үшін қаржыландыру шарттары әр түрлі. Қаржыландыру құқығын ЕО-ға мүше мемлекеттердің, қауымдасқан елдердің, сондай-ақ Қазақстан, Қырғызстан, Тәжікстан, Түрікменстан және Өзбекстанды қоса алғанда, кейбір үшінші елдердің ұйымдары автоматты түрде алады», – деп хабарланады Еуропалық одақтың (ЕО) «Орталық Азиядағы тұрақты энергетикалық байланыстар» (SECCA) жобасының сайтында.

SECCA жобасы Орталық Азия елдерінің ұйымдарына «Климат, энергетика және мобильділік» бағдарламалық кластері шеңберінде қатысу бойынша консультациялық қолдау көрсетеді. SECCA ОА елдеріне бағдарлама шеңберінде қаржыландырылатын ғылыми жобаларға белсенді қатысу үшін алғышарттар жасауға және әлеуетті арттыруға көмектесуге тырысады.

«Горизонт Еуропа» бағдарламасына қатысу шарттары туралы толық ақпаратты SECCA жобасының сайтында мына сілтеме бойынша алуға болады https://secca.eu/knowledge-hub/horizoneu/.