QAZAQ GREEN. 2025 жылғы 5 наурызда Бельгияның Брюссель қаласында Қазақстан Республикасы – Еуропалық Одақтың энергетика, көлік, қоршаған орта және климаттың өзгеруі мәселелері жөніндегі кіші комитетінің 8-ші отырысы өтті. Қазақстан делегациясын ҚР Энергетика вице-министрі Ерлан Ақкенженов басқарды, деп хабарлайды Энергетика министрлігінің баспасөз қызметі.

Қазақстан еуропалық компаниялармен мұнай-газ химиясы, шикізатты терең өңдеу және жоғары технологиялық өндірістерді дамыту саласындағы ынтымақтастықты кеңейтуге мүдделі екенін білдірді. Осы бағытта салықтық және кедендік жеңілдіктер, сондай-ақ ірі инвестициялық жобаларды қолдау тетіктері қарастырылған.

«Жасыл» энергетика саласында ЕО Қазақстанның 2060 жылға қарай көміртегі бейтараптығына жету мақсатын қолдайтынын растады. Тараптар Еуропалық инвестицияларды ЖЭК саласына тарту, сутегі энергетикасы мен парниктік газдар шығарындыларын азайту жобалары бойынша ынтымақтастықты талқылады. Қазақстан «жасыл» қаржыландыру, технологиялық алмасу және кадр даярлау маңыздылығын атап өтті.

Тараптар Орталық Азия мен ЕО арасындағы тұрақты даму саласындағы серіктестікті нығайту және экологиялық бастамаларды ілгерілету бойынша өзара қызығушылық білдірді.

«Қазақстан Республикасы – Еуропалық Одақ» кіші комитетінің келесі 9-шы отырысы 2026 жылы Астана қаласында өтеді деп жоспарлануда.