QAZAQ GREEN.  Қытайға жұмыс сапары аясында Директорлар кеңесінің төрағасы Нұрлан Казутин мен Басқарма төрағасы Қуат Мақсұтов бастаған «Самұрық-Энерго» АҚ делегациясы ҚХР ірі энергетикалық компанияларымен бірқатар кездесулер өткізді.

Бейжіңде Power Construction Corporation of China (POWERCHINA) өкілдерімен кездесу өтті, оған корпорацияның басқарма мүшесі Чэнь Гуаньфу, POWERCHINA Resources президенті Джун Хайсян және POWERCHINA Sepco1 президенті Джан Хунмэй қатысты. Бірлескен жобаларды іске асыру барысы және ынтымақтастықты тереңдету перспективалары талқыланды. Жалпы қуаты 810 МВт болатын ЖЭК саласындағы жобалар, сондай-ақ Алматы ЖЭО-2 көмірден газға ауыстыру басты назарда болды. Нысанда құрылыс жұмыстары жүргізілуде.

Сондай-ақ, China Machinery Engineering Corporation (CMEC) президенті Фанг Яншуймен кездесу өтті. Қолданыстағы станцияларды жаңғыртуда, олардың тиімділігін арттыруда және экологиялық жүктемені төмендетуде өзара іс-қимылдың ықтимал бағыттары талқыланды. CMEC басшысы компанияның қазақстандық энергетикалық нарыққа деген қызығушылығын растап, ЕРС-мердігер ретінде жобаларға қатысуға дайын екендігін білдірді. Атап айтқанда, CMEC Франция, БАӘ және Қытайдан келген серіктестермен бірлесіп «Самұрық-Энерго» АҚ іске асыратын ЖЭК объектілерін салу бойынша халықаралық тендерлерге қатысуды қарастыруда.

China Energy Engineering Corporation (CEEC) жаһандық бизнес жөніндегі президенті Лю Цзэсянмен келіссөздерде ЖЭК және дәстүрлі энергетика саласындағы ағымдағы және перспективалы жобалар талқыланды. Түркістан облысында қуаты 300 МВт күн электр станциясының құрылысына ерекше назар аударылды. Осы жоба бойынша 2025 жылғы 16 маусымда «Орталық Азия — Қытай» энергетикалық форумы шеңберінде электр энергиясын сатып алу туралы келісімге (PPA) қол қойылды.

Жұмыс сапары Қазақстан мен Қытайдың энергетика саласындағы стратегиялық әріптестігін нығайтып, инвестициялық жобаларды бірлесіп іске асырудың жаңа бағыттарын белгіледі.