QAZAQ GREEN. АР Парламентінің спикері Ален Симонянның мәлімдеуінше, Арменияда 2030 жылға қарай жаңартылатын көздер есебінен елдің энергия теңгерімінің кемінде 15%-ын қамтамасыз ете отырып, күн энергетикасы саласындағы өндірісті үш есеге арттыруға ниетті, деп хабарлайды Arka News Agency.      

«Жаңартылатын энергия Арменияның басты басымдықтарының бірі болып табылады. Жылдың 270 шуақты күнімен біздің ел күн энергиясын энергетикалық стратегияның орталық бөлігіне айналдыра алады. Таза энергияға көшу біздің қазбалы отынға тәуелділігімізді және жылыжай газдарының шығарындыларын азайтады, бұл тұрақты дамуға ықпал етеді», – деп атап өтті Симонян Парламентаралық одақтың 149-шы Ассамблеясының алаңдарында өткен жалпы пікірталаста.      

 Ғылым мен технология Армения ресурстарын тиімдірек басқаруда және климаттың өзгеруіне байланысты тәуекелдерді азайтуда маңызды рөл атқарады, деді ол.   

«Бұл саладағы прогресс біздің проблемарымыздың шешімін ұсынады – ауыл шаруашылығының өнімділігін арттырудан бастап табиғи апаттарға қарсы күресті жақсартуға дейін», – деді Симонян.   

Парламент спикері сондай-ақ Армения көмірқышқыл газының шығарындыларын азайтуға, ресурстарды сақтауға және экологиялық жауапкершілік мәдениетін ынталандыруға ниетті екенін мәлімдеді.   

Ұлттық статистика комитетінің деректері бойынша, Арменияда ағымдағы жылдың қаңтар-тамыз айларында гелиостанциялардың электр энергиясын өндіру көлемі 31,3% өсім кезінде  706.4 млн кВт.сағ құрады. Бұл сегменттің елдегі электр энергиясын өндірудің жалпы көлеміндегі үлес салмағы 11,6% құрайды.