QAZAQ GREEN.  Әзірбайжанның мақсаты – 2027 жылға қарай 2 гигаватт (ГВт) көлемінде күн және жел электр энергиясын өндіру. «Report» хабарлағандай, бұл туралы Әзірбайжан президенті Ильхам Алиев Давостағы CGTN (China Global Television Network) қытайлық телеарнасына берген сұхбатында мәлімдеді.

«Менің ойымша, қазба отындары бар елдер өздерінің қазба отынынан түсетін кірістерін жасыл технологиялар мен жасыл энергияға инвестициялауға міндетті. Біз инвесторларға инвестициялау үшін жақсы мүмкіндіктер бере отырып, осымен айналысамыз. Біздің ең жақын мақсатымыз – 2027 жылға қарай екі гигаватт күн және жел энергиясын өндіруді қамтамасыз ету, ал 2030 жылға қарай бұл көлемді алты гигаватқа жеткізу, бұл Әзірбайжанның энергетикалық портфелінде революцияға айналмақ», – деп атап өтті Ильхам Алиев.

«Осы жобаларға инвестиция салатын шетелдік және Әзірбайжаннан шыққан жергілікті инвесторлар қытайлық технологияларды қолданатынын қосқым келеді. Мысалы, күн панельдері Қытайда шығарылады. Біздің команда қазір сақтау сыйымдылығымен жұмыс істеп жатыр және біз Қытайда ең үздік батареялар шығарылғанын анықтадық. Сондықтан мен қытайлық өндірушілерді осы керемет жетістікпен құттықтаймын, өйткені бұл – сапа да, баға да. Ешкім олармен бәсекеге түсе алмайды», – деді Әзербайжан президенті Ильхам Алиев.