QAZAQ GREEN.  Шығыс Германияда Лейпциг маңында 500 га аумақты алып жатқан ең ауқымды еуропалық WITZNITZ күн электр станциясы іске қосылды. Оның клиенттері Shell мұнай-газ концерні және Microsoft корпорациясы сияқты алыптар болды. Бұл туралы DW-ге сілтеме жасай отырып, Экополитика хабарлайды.

Witznitz энергия паркі 1 млн 100 мың фотоэлектрлік панельден тұрады. Олар 500 га аумақта орналасқан, бұл, шамамен, 700 футбол алаңының ауданына тең. Электр станциясының қуаты – 650 МВт. Салыстыру үшін: қазіргі атом электр станцияларында бір энергия блогының қуаты 1000-нан 1200 МВт-қа дейін құрайды.

Электр беріліс жүйесінің операторы – 50Hertz компаниясының айтуынша, заманауи жабдықтар мен реактивті қуаттың электртехникалық әсерін пайдаланудың арқасында бұл КЭС алғаш рет тәуліктің қараңғы уақытында да желінің тұрақтылығын қамтамасыз ете алады.

Witznitz электр станциясының құрылысын 2020 жылы бастады, ал 2023 жылғы желтоқсанда оның бірінші кезегі электр энергиясын өндіре бастады. Бұл жобаны іске асыруды Signal Iduna сақтандыру концерні толық қаржыландырды. Ол үлкен күн электр станциясын тұрақты табыс көзі ретінде де, «жасыл ауысуға» қосқан өз үлесін де, сәйкесінше ұтымды имидждік жобаны да көреді.

Witznitz энергетикалық паркінің барлық дерлік қуатына Shell концерні 15 жылға келісімшарт жасады. Алынған энергияның жартысына жуығы Microsoft корпорацияларына қайта сатылады. Британдық мұнай-газ компаниясы да, американдық IT индустриясының алыбы да өз бизнесін көміртексіздендіру үшін өзінің өршіл мақсаттарын орындау мақсатында үлкен көлемдегі «жасыл» электр энергиясын қажет етеді.

«Witznitz энергия паркі біздің портфельдің орталық элементтерінің біріне айналады. Біз көміртексіздендіру ісіне маңызды үлес қосқанымызға қуаныштымыз», – деді Кристоф Люкен, Signal Iduna концернінің инвестициялық бөлімшесі Hansainvest Real Assets компаниясының басшысы.