QAZAQ GREEN. 2025 жылғы 26 және 27 мамырда жаңартылатын энергия көздері (ЖЭК) жобаларын іріктеу бойынша аукциондық сауда-саттықтар өткізілді. Бұл сауда-саттықтар Қазақстан Республикасының БЭЖ Оңтүстік және Солтүстік аймақтарында жалпы қуаттылығы 150 МВт болатын жел электр станцияларын (ЖЭС) салу мақсатында ұйымдастырылды, деп хабарлайды KOREM.

26 мамырда өткен аукцион Оңтүстік аймаққа арналды. Сауда-саттыққа 7 компания жіберілді, олар 26 баға ұсынысын ұсынды. Жалпы ұсынылған жобалар көлемі – 300 МВт. Ұсынылған бағалар 22,09-дан 13,19 тг/кВт·сағ дейін (ҚҚС-сыз) аралығында болды. Аукционның шекті бағасы – 22,68 тг/кВт·сағ (ҚҚС-сыз). Сауда қорытындысы бойынша 50 МВт жобасымен "Zhasyl Mura" ЖШС жеңімпаз деп танылды. Аукциондық баға – 13,19 тг/кВт·сағ (ҚҚС-сыз).

27 мамырда Солтүстік аймақ бойынша аукцион өтті. Саудаға 8 компания қатысты, олар 600 МВт көлемінде 14 баға ұсынысын берді. Ұсынылған бағалар 18,05-тен 11,49 тг/кВт·сағ дейін (ҚҚС-сыз) аралығында болды. Нәтижесінде 100 МВт жобасымен "Zeta Wind" ЖШС жеңімпаз болып анықталды. Аукциондық баға – 11,49 тг/кВт·сағ (ҚҚС-сыз).

Барлық сауда-саттық барысында ҚР Энергетика министрлігі, «Қазақстан Электр энергетикалық қауымдастығы» ЗТБ, «KazEnergy» ЗТБ, сондай-ақ өңірге байланысты «KAZAKH INVEST» ҰК» АҚ және «EcoJer» ЗТБ өкілдері бақылаушы ретінде қатысты. Бақылаушылар аукцион ұйымдастырушысы – «KOREM» АҚ электрондық сауда жүйесінің ашықтығын растады.