QAZAQ GREEN.  2025 жылғы 29 желтоқсанда Қазақстан Республикасының Біртұтас электр энергетикалық жүйесінің (БЭЖ) Оңтүстік аймағы үшін жиынтық орнатылған қуаты 600 МВт болатын күн электр станциясын салу жобаларын іріктеу мақсатында жаңартылатын энергия көздері (ЖЭК) бойынша еркін аукциондық сауда-саттық өтті.

Еркін аукциондық сауда-саттық шеңберінде жүзеге асырылатын күн электр станцияларын салудың міндетті шарттарының бірі – объектінің орнатылған қуатының кемінде 30 %-ын құрайтын электр энергиясын сақтау жүйелерімен жабдықтау, сондай-ақ аталған қуатты кемінде төрт сағат бойы беруді қамтамасыз ететін энергия сыйымдылығының болуы.

Аукциондық сауда-саттыққа қатысуға 2 компания жіберілді. Сауда сессиясы барысында қатысушылар тарапынан 2 баға ұсынылды. Берілген өтінімдердің жиынтық көлемі 1200 МВт-ты құрады.

Аукциондық сауда-саттықтың қорытындысы бойынша жеңімпаз болып «Altyn Dala Energy Ltd.» жеке компаниясы танылды. Жобаның орнатылған қуаты – 600 МВт, аукциондық баға – 34,60 теңге/кВт·сағ (ҚҚС-сыз).

Аукциондық сауда-саттыққа байқаушы ретінде Қазақстан Республикасы Энергетика министрлігі, «Атамекен» Ұлттық кәсіпкерлер палатасы, «Қазақстан электрэнергетикалық қауымдастығы», сондай-ақ Германияның Халықаралық ынтымақтастық қоғамы (GIZ) өкілдері қатысты.

Байқаушылар электрондық сауда жүйесінің ашықтығы мен дұрыс жұмыс істегенін растады, оның операторы ретінде «KOREM» АҚ қызмет атқарды.