QAZAQ GREEN. Qazaq Green ЖЭК қауымдастығының директорлар кеңесінің төрағасы Нұрлан Қапенов 23-24 ақпанда Италияның Рим қаласында өткен Еуропалық Одақ - Орталық Азия жоғары деңгейдегі жетінші конференциясына қатысты.

Нұрлан Қапенов «ҮЕҰ / азаматтық қоғам ұйымдарының өкілдері: азаматтық қоғамның пікірі» сессиясында «Қазақстандағы ЖЭК дамуы: жетістіктері, проблемалары мен әлеуеті» тақырыбында баяндама жасады.

Конференцияға Орталық Азия елдері: Қазақстан, Қырғызстан, Түрікменстан, Тәжікстан және Өзбекстан үкіметтерінің, Еуропалық Одақ және ЕО-ға мүше мемлекеттердің қоршаған орта, климаттың өзгеруі және су ресурстары саласындағы саясатқа жауапты, халықаралық, өңірлік және үкіметтік емес ұйымдардың өкілдері қатысты.

ЕО мен Орталық Азияның қоршаған орта және су ресурстары жөніндегі ынтымақтастық платформасы шеңберінде ұйымдастырылған конференцияның мақсаттары мынадай:

• ЕО-ОА экологиялық және су бойынша ынтымақтастық платформасы мен оның қоршаған орта және климаттың өзгеруі жөніндегі жұмыс тобының (WGECC) қызметінің 2019 жылдың қаңтарынан бергі нәтижелерін ұсыну;

• ЕО-ОА платформасы үшін 2023-2025 жылдарға арналған басым бағыттарды айқындау;

• Орталық Азиядағы қоршаған орта, климаттың өзгеруі және су ресурстары саласындағы саяси диалогты жандандыру және әлеуетті дамыту үшін практикалық қадамдарды талқылау және келісу.

Сессиядағы негізгі пікірталас Орталық Азия өңірі үшін «жасылға» көшуді жеделдету және азаматтық қоғам тұрғысынан орнықты даму мақсаттарына қол жеткізу жөніндегі негізгі сын-қатерлер мен мүмкіндіктерді талқылауға арналды.

Конференция 2019 жылдың қазан айында Еуропалық Одақ қайта бастаған WECOOP «Еуропалық Одақ – Орталық Азия: су ресурстары, қоршаған орта және климаттың өзгеруі саласындағы ынтымақтастық (WECOOP)» жобасы аясында ұйымдастырылды. Жоба Орталық Азия елдері арасындағы орнықты даму жөніндегі диалогты нығайтуды жалғастыруда және олардың ЕО-мен қоршаған ортаны қорғау және климаттың өзгеруі саласындағы ынтымақтастығын кеңейтуге жәрдемдеседі. Атап айтқанда, жоба шеңберіндегі қызмет саяси стратегияларды жетілдіруге және ұтымды етуге, тиісті салаларда жұмыс істейтін ұлттық министрліктер мен мемлекеттік ведомстволардың әлеуетін нығайтуға бағытталған.

WECOOP жобасы ЕО стандарттарына жақындату арқылы Орталық Азиядағы қоршаған орта, климаттың өзгеруі және су ресурстары саласындағы саясатты жақсартуға, сондай-ақ көмірқышқыл газы (CO2) шығарындыларын қоса алғанда, адам қызметінен туындаған ластануды айтарлықтай азайтуға қол жеткізу мақсатында экономиканың тиісті секторларына «жасыл» инвестицияларды ынталандыруға бағытталған.

Жобалық қызметте ЕО-Қоршаған орта және су ресурстары саласындағы ынтымақтастық жөніндегі Орталық Азия платформасының (Платформа) және ЕО-Қоршаған орта және климаттың өзгеруі жөніндегі Орталық Азия жұмыс тобының (РГЭИК) қолдауы қамтылады. Соңғысының қатарына қоршаған орта және климат жөніндегі Еуропалық комиссияның Бас директоратының өкілдері кіреді.