QAZAQ GREEN. CCPI 2024 рейтингінде Қазақстан индексі 38,52 құрады. 2024 жылы климаттың өзгеруіне қарсы күрестің тиімділігі бойынша 67 елдің ішінен Қазақстан тек 60-орынды иеленді.

Ағымдағы жылдың қаңтар-ақпан айларында қоршаған ортаны қорғауға бағытталған күрделі инвестициялар 11,3 млрд теңгені құрады – өткен жылмен салыстырғанда 45,7%-ға аз.

Өңірлік бөліністе сектордағы инвестициялардың басым бөлігі Ақмола облысына тиесілі болды: бір жыл бұрынғы 7,7 млрд теңгеге қарағанда 4 млрд теңге. Инвестиция көлемі 47,5%-ға қысқарды. Бұдан әрі Атырау облысы (3,5 млрд теңге), Шымкент (1,7 млрд теңге) және Астана (1,7 млрд теңге) келеді.

Қоршаған ортаны қорғауға салынған күрделі салымдар елдің 20 аймағының 8-інде ғана бөлінді.

Қоршаған ортаны қорғауға бағытталған инвестициялардың жалпы көлемінің 80,4%-ын кәсіпорындардың меншікті қаражаты құрады: 9,1 млрд теңге – 2023 жылғы қаңтар-ақпанға қарағанда 22,8%-ға аз.

Банктік емес қарыз қаражатына бір жыл бұрынғы 6,6 млрд теңгеге қарсы 1,6 млрд теңге, банктік кредиттерге – 2023 жылғы 2,3 млрд теңгеге қарсы 621,2 млн теңге келді, деп хабарлайды finprom.kz.

CCPI сарапшылары жаһандық парниктік газдар шығарындыларының 90%-дан астамын бірге өндіретін 63 ел мен Еуропалық одақты бағалады. Индекс 4 санатқа кіретін 14 көрсеткіш негізінде есептелді: парниктік газдар шығарындылары, жаңартылатын энергия көздері (ЖЭК), энергияны пайдалану және климаттық саясат.

Рейтинг төртінші орыннан басталды, өйткені сарапшылар бірде-бір ел үштікке лайық емес екенін атап өтті. Төртінші орынды Дания иеленді, одан кейін Эстония мен Филиппин орналасып, ал Сауд Арабиясы рейтингті жапты.

Тізімге енген ТМД елдері арасында Беларусь пен Өзбекстан Қазақстаннан жақсы болды. Барынша төмен индекс – Ресейде.

Естеріңізге сала кетейік, 2030 жылға қарай ҚР парниктік газдар шығарындыларын 1990 жылмен салыстырғанда 15%-ға қысқартуды жоспарлап отыр. Жалпы ел бойынша электр энергиясын өндірудегі ЖЭК үлесі 2030 жылға қарай 15% деңгейінде қалыптасуы тиіс. Әзірге, 2023 жылғы қаңтар-желтоқсан қорытындылары бойынша олардың үлесі небәрі 5,9%-ды құрайды.

 Климаттың өзгеруіне қарсы күрестің тиімділік индексі (ағылш. Climate Change Performance Index, CCPI) - халықаралық климаттық саясаттағы ашықтық деңгейін арттыру мақсатында Germanwatch неміс экологиялық ұйымы құрастыратын көрсеткіш. Индекс 2005 жылдан бастап жыл сайын жасалады.