QAZAQ GREEN. 2024 жылы Қытайда жаңартылатын энергия көздері (ЖЭК) негізіндегі жаңа электр станцияларының орнатылған қуаты барлық жаңа генерация объектілерінің 86%-ын құрады. Осылайша, елдегі жалпы орнатылған қуаттың 56%-ға жуығы ЖЭК-ке тиесілі болды. Бұл туралы Қытайдың Мемлекеттік энергетика басқармасы жариялаған жаңа мәліметтерге сүйене отырып, «Синьхуа» агенттігі хабарлады.

Деректерге сәйкес, 2024 жылы Қытайда жаңадан іске қосылған ЖЭК қуаты 373 ГВт-қа жетіп, жылдық өсім 23%-ды құрады. Оның ішінде гидроэнергетика – 13,78 ГВт, жел энергетикасы – 79,82 ГВт, күн энергетикасы – 278 ГВт, ал биомасса энергетикасы – 1,85 ГВт қосымша қуат енгізді.

2024 жылдың соңында Қытайдағы жаңартылатын энергия көздерінің жалпы орнатылған қуаты 1,889 ТВт-қа жетіп, өткен жылмен салыстырғанда 25%-ға артты. Оның ішінде гидроэнергетика – 436 ГВт, жел энергетикасы – 521 ГВт, күн энергетикасы – 887 ГВт, биомасса энергетикасы – 46 ГВт құрады.

Бұл – қатарынан екінші жыл, ЖЭК-тің жалпы қуаты Қытайдағы барлық электр қуатының 50%-дан асуын көрсетіп отыр. 2023 жылдың соңында бұл көрсеткіш алғаш рет жартыдан жоғары деңгейге жеткен еді.

Сонымен қатар, 2024 жылы Қытайда жаңартылатын энергия көздерінен өндірілген электр энергиясы 3,46 трлн кВт/сағатқа жетіп, өткен жылмен салыстырғанда 19%-ға артты. Бұл жалпы электр энергиясы өндірісінің шамамен 35%-ын құрайды.

Жел және күн энергиясынан өндірілген электр энергиясы 1,83 трлн кВт/сағатқа жетіп, 2023 жылмен салыстырғанда 27%-ға артты. Бұл көрсеткіш 2024 жылы Қытайдың үшінші сектордағы (қызмет көрсету саласы) электр тұтыну деңгейіне шамалас, тіпті тұрмыстық тұтыну көлемінен (1,49 трлн кВт/сағат) асып түсті.

Қытай 2030 жылға қарай көмірқышқыл газы шығарындыларының ең жоғары деңгейіне жетуді және 2060 жылға қарай көміртектік бейтараптыққа қол жеткізуді көздейтін «қос көміртек мақсатына» ұмтыла отырып, жасыл экономиканы белсенді дамытып жатыр. Оның негізгі қозғаушы күштерінің бірі – жаңартылатын энергетика.