QAZAQ GREEN. АҚШ-та жұмыс істеп тұрған күн электр станцияларының жиынтық қуаты 50 млн-нан астам америкалық үйді электр энергиясымен қамтамасыз етуге жетеді. Бұл елдегі барлық үй шаруашылықтарының үштен бірінен астамына тең, деп хабарлайды SEIA және Wood Mackenzie.

Solar Energy Industries Association (SEIA) мен Wood Mackenzie дайындаған U.S. Solar Market Insight есебіне сәйкес, 2026 жылдың екінші тоқсанында АҚШ-та 11,4 ГВт жаңа күн энергетикасы қуаты іске қосылды. Бұл өткен жылдың сәйкес кезеңімен салыстырғанда 45%-ға, ал бірінші тоқсанмен салыстырғанда 43%-ға көп.

«Күн энергетикасы мен энергия жинақтау жүйелері америкалықтардың басым бөлігі әлі толық бағамдап үлгермеген ауқымға жетті. Елдегі энергияға сұраныстың өсуін бұл технологияларсыз қамтамасыз ету мүмкін емес», — деді SEIA бас директоры Тим Полента.

Екінші тоқсандағы өсімге негізінен ірі күн электр станциялары әсер етті. Бұл сегментте 9,6 ГВт жаңа қуат іске қосылып, жылдық өсім 61%-ды құрады.

Жоғары көрсеткішке жобаларды 2026 жылғы шілдеде салықтық жеңілдіктердің қолданылу мерзімі аяқталғанға дейін жедел іске қосу да әсер етті. Сонымен қатар алдағы жылдары іске асырылатын жобалардың едәуір қоры саланың өсуін жалғастыруға мүмкіндік береді.

2026 жылдың бірінші жартыжылдығында күн энергетикасы мен энергия жинақтау жүйелерінің үлесі АҚШ электр желісіне қосылған жаңа қуаттың 70%-ын құрады.

Есеп болжамына сәйкес, АҚШ-тың күн энергетикасы нарығы алдағы бес жылда екі есеге жуық өседі. Wood Mackenzie сарапшыларының бағалауынша, қалыптасқан жобалар портфелі мен салықтық жеңілдіктердің қолданылу мерзімі аяқталғанға дейін тиісті талаптарға сай келген жобалардың есебінен 2031 жылға дейін жыл сайын шамамен 44 ГВт жаңа қуат іске қосылуы мүмкін.

Сонымен бірге рұқсат алу рәсімдері мен инвестициялық салықтық жеңілдіктер жойылғаннан кейінгі кезеңге бейімделу саланың дамуын тежейтін негізгі факторлардың қатарында қалады.

«Жобалардың тұрақты портфелі және салықтық жеңілдіктерге қатысты талаптарды алдын ала орындаған қуаттарды дамыту 2031 жылға дейін жыл сайын шамамен 44 ГВт қуат енгізуге мүмкіндік береді», — деді Wood Mackenzie аға талдаушысы Кейтлин Коннелли.

Жеке үйлерге арналған күн энергетикасы нарығы тұрғындарға берілетін салықтық жеңілдіктің мерзімі аяқталғаннан кейін қиындықтарға тап болып отыр. Дегенмен сарапшылар бұл сегменттің 2027 жылы қайтадан өсе бастайтынын күтеді. Америкалықтар күн энергетикасын электр энергиясына жұмсалатын шығынды азайту және үйлерді энергиямен қамтудың тұрақтылығын арттыру үшін таңдауды жалғастырып келеді.

Күн энергетикасының өсімі АҚШ-тың барлық өңірінде байқалады. 2024 жылғы президент сайлауында Дональд Трампты қолдаған штаттарға 2026 жылдың алғашқы алты айында іске қосылған күн энергетикасы қуатының 71%-ы тиесілі болды. Жаңа күн энергетикасы нысандарын орнату көлемі бойынша алғашқы ондыққа енген штаттардың сегізі де осы топқа кірді.