QAZAQ GREEN. Қытайдың Sinoma EC International компаниясы Өзбекстанның Навои облысында қуаты 300 мегаватт болатын күн электр станциясын және 75 мегаватт электр энергиясын сақтайтын жүйелерді салады, деп хабарлайды Podrobno.uz.

Күн электр станциясын Навои облысының Карман ауданында салуға арналған инвестициялық келісімге қол қойылғанын Өзбекстанның Инвестициялар, өнеркәсіп және сауда министрлігінің баспасөз қызметі хабарлады. Құжатқа ведомство басшысы Лазиз Кудратов пен Sinoma EC International Investment Co., Ltd компаниясының бас директоры Цзо Даунның қатысуымен қол қойылды.

Бұл жобаның іске қосылуы Өзбекстанның «Өзбекстан-2030» стратегиясы аясында жаңартылатын энергия көздерінің жалпы қуатын 25 мың мегаваттқа жеткізу және елдің жалпы тұтынуындағы үлесін 40%-ға дейін арттыру мақсаттарына қол жеткізудегі кезекті маңызды қадам болады деп күтілуде.

Sinoma EC International Investment Co., Ltd. – 1987 жылы құрылған Sinoma Energy Conservation Co., Ltd. еншілес компаниясы. Компанияның капитализациясы 600 миллиард долларды құрайды, ал қызметкерлер саны – 2000 адам. Компания қалдық газдардың жылуын пайдаланатын WHR электр станцияларын, күн, геотермальдық және биоэлектр станцияларын салуға маманданған. Әлем бойынша 1000-нан астам жобаны жүзеге асырған.