QAZAQ GREEN. Өзбекстанда энергия тиімділігін арттыруға бағытталған ауқымды бағдарламаны іске асыру жоспарлануда, оның аясында үйлердің шатыр алаңдарының жартысы күн панельдерімен жабдықталатын болады, деп хабарлайды Podrobno.uz.

Жаңа бастамалар туралы O’zbekiston 24 телеарнасына берген сұхбатында Өзбекстанның Энергетика министрі Журабек Мирзамахмудов айтып берді. Оның айтуынша, бағдарлама аясында қосымша 1 гигаватт «жасыл» қуат көздерін құруға арналған бірнеше жоба әзірленеді. Бұл қазірдің өзінде жоспарланған 3,5 гигаватт қуатқа қосымша болады. Алдағы екі жылда шамамен үш мың шағын гидроэлектр станциясын іске қосу жоспарланып отыр.

Сонымен қатар, Мирзамахмудов күн технологияларын дамытудың маңыздылығын атап өтті.
«Шатыр алаңдарының кемінде 50%-ына күн панельдері мен гелиоколлекторлар орнату бойынша бағдарлама әзірлеу туралы тапсырма берілді», – деді министр.

Бұл қадам елдегі жаңартылатын энергия көздерінің үлесін арттыруға және дәстүрлі энергия ресурстарына тәуелділікті азайтуға бағытталған.

Сондай-ақ, энергия тиімділігі төмен кәсіпорындарды жаңғырту және электр энергиясын, табиғи газды және жылу энергиясын үнемдеу стратегиялары әзірленеді.

Осыған дейін Өзбекстан Президенті Шавкат Мирзиёев «Қоршаған ортаны қорғау және жасыл экономика жылы» мемлекеттік бағдарламасының жобасы бойынша кеңес өткізген болатын.