QAZAQ GREEN. 5 ақпанда Бейжіңде Қырғызстан мен Қытай арасында энергетика саласындағы инвестициялық келісімдер жасалды. Құжаттарға қол қою Қырғыз Республикасы Президенті Садыр Жапаровтың Қытай Халық Республикасына мемлекеттік сапары аясында өтті, деп хабарлайды ҚР Энергетика министрлігінің сайты.

Келісімдерге сәйкес, Қырғызстанда жаңартылатын энергия көздері бойынша екі нысан – жел электр станциясы (ЖЭС) және күн электр станциясы (КЭС) салынады, әрқайсысының қуаты 300 МВт. Инвестициялық келісімдерге Қырғыз Республикасының Министрлер Кабинеті мен қытайлық Shenzhen Energy Group Co., Ltd компаниясы қол қойды.

Құжаттарға Қырғызстанның энергетика министрі Таалайбек Ибраев пен Shenzhen Energy вице-президенті Ли Чжуогэ қол қойды.

Бұл саладағы ынтымақтастық Қырғызстанда жаңартылатын энергия көздерін дамытуға жаңа мүмкіндіктер ашады, инвестиция тартуға және елдің энергетикалық қауіпсіздігін арттыруға ықпал етеді.

Shenzhen Energy – Шэньчжэндегі ең ірі электр энергия өндірушілердің бірі және энергетикалық инфрақұрылымға жетекші инвестор. Компания дәстүрлі және жаңартылатын энергия көздерін дамыту және пайдалану саласында жұмыс істейді, сондай-ақ энергия тиімділігін арттыруға бағытталған жобаларға инвестиция құяды.