QAZAQ GREEN. Sergek камералары Қазақстанның электр желісі мен интернеті жоқ шалғай өңірлерінде де жұмыс істей алады..

Жетісу облысының Алакөл ауданына қарасты Жайпақ ауылында электр қуатына тәуелсіз жұмыс істейтін аппараттық-бағдарламалық кешен (АБК) пилоттық режимде орнатылды. Кешеннің үздіксіз жұмысын күн сәулесінен қуат алатын арнайы панель қамтамасыз етеді.

Жоба электр қуаты тартылмаған елді мекендерге бақылау жүйесін орнату қажеттілігіне байланысты жүзеге асқан. Бұған дейін кешенге қуат беру үшін аккумулятор қолданылған. Алайда оны күн сайын ауыстыру қажет болған, бұл шалғай ауылдарда тиімді шешім бола алмады.

Альтернативті қуат көзі күрделі техникалық қызметті талап етпейді және орнату жағынан да жеңіл. Бұл оны инфрақұрылымы жоқ елді мекендерге тиімді бейімдеуге мүмкіндік береді.

Инженерлік шешім Sergek Group компаниясы тарапынан әзірленді. Компания өкілдерінің айтуынша, мұндай тәсіл шалғай трассалар мен ауылдық жерлерде де қауіпсіздік жүйелерін кеңінен қолдануға жол ашады.