QAZAQ GREEN. Қарақөл шағын гидроэлектростанциясының (ГЭС) құрылысын шетелдік инвестормен бірлесіп «Демир Кыргыз Интернэшнл Банк» (DemirBank) ЖАҚ басқармасы қолға алғысы келеді. Бұл туралы инвестициялық форумның отырысында Қырғызстан министрлер кабинетінің төрағасы Ақылбек Жапаров мәлімдеді, деп хабарлайды Kabar.

Оның айтуынша, бұған дейін инвестор ретінде Дүниежүзілік банкті қарастыру жоспарланған болатын. Дегенмен, бұл жағдайда жобаны ратификациялау процесі белгілі бір уақытты алатын еді.

«Өз кезегінде банк басқармасы мен шетелдік инвестор шағын ГЭС құрылысын 1,5-2 жылда аяқтауды жоспарлап отыр», – деді ол.

Естеріңізге сала кетейік, бұған дейін Қырғызстанның Энергетика министрлігінде Қара Суу өзенінде шағын ГЭС салуға конкурс жариялауға дайын екендігі туралы хабарланған болатын.

Қаракөл ГЭС құрылысы Жалал-Абад облысының Тоқтоғұл ауданындағы Қара-Суу өзенінде жоспарланған. Бұл өзен - Нарын өзенінің сол жағалауындағы саласы. Ол Тоқтоғұл ГЭС төменгі бьефімен түйісетін сағалық учаскеде орналасқан.

Оның құрылысы 25 млн долларға бағаланады. Жобалық қуаты 18 МВт құрайды. Орташа жылдық өндірісі 110 млн кВт/сағ бағаланады.

Еске сала кетейік, Еуразиялық Даму Банкі (ЕАДБ) және «Нарын» өндірістік кәсіпорны» ЖШҚ Қырғыз Республикасында қуаты 100 МВт болатын «Құланақ» ГЭС-ін салу мен пайдалануды қаржыландыру шартын жасасқан болатын.